लुम्बिनी प्रदेशमा एमालेबाट मुख्यमन्त्री हुने सम्भावना देखिएको छ। सत्ता गठबन्धन तयार नहुँदा प्रदेशमा संसदीय दलको नेता चयन भने अहिलेसम्म पनि भएको छैन। कुनै पनि दलले नेता चयन गरेका छैनन्। सबैभन्दा ठूलो दल एमालेमा संसदीय दलको नेता चयन, सरकार निर्माण विषयमा कुनै छलफल नै भएको छैन। ‘अब माथि (संघीय) सरकारमा गठबन्धन तयार भएकाले त्यहीअनुसार नै प्रदेशमा हुन्छ,’ एमाले सांसद एव पूर्वमन्त्री भोजप्रसाद श्रेष्ठले भने, ‘को नेता बन्ने, के गर्ने भन्ने विषयमा छलफल हुँदैछ।’

एमालेले मुख्यमन्त्री पाए रुपन्देहीका सांसद लिला गिरी चयन हुने सम्भावना छ। उनी पार्टीभित्र अन्यभन्दा वरिष्ठ छन्। यद्यपि, नवनियुक्त उपप्रधान तथा अर्थमन्त्री विष्णु पौडेल र एमाले महासचिव शंकर पोखरेलको चासोमा संसदीय दलको नेता को बन्ने परेकाले केन्द्रबाटै यसको निक्र्यौल हुनेछ। पहिलो कार्यकालमा एमालेले मुख्यमन्त्री र माओवादीले सभामुख पाएका थिए। माओवादीले मुख्यमन्त्री पाउँदा रोल्पाका सांसद जोखबहादुर महरा चयन हुने नेताहरूले बताएका छन्। सत्ता बाडँफाटमा दलको टुंगोपछि मात्रै व्यक्तिको चर्चा हुने नेताहरूले बताएका छन्।