बुटवल, पुस २ । प्रदेश खाद्य परिषद गठनको कार्य अगाडि बढाउन माग गर्दै फियान नेपालले भूमि व्यवस्था कृषि तथा सहकारी मन्त्रालय लुम्बिनी प्रदेशलाई आग्रह गरेको छ । खाद्य अधिकारको क्षेत्रमा काम गर्दैै आएको फियानले आइतबार बुटवलमा छलफल र अन्तरक्रिया गरेर परिषद गठनको प्रक्रिया अगाडि बढाउन माग गरेको हो । फियानले परिषद गठनका लागि तयार पारेको ड्राफ्ट पनि मन्त्रालयलाई बुझाएको छ ।
फियान नेपालका निर्देशक सुरेश गौतमले नयाँ बन्ने सरकार र कृषि मन्त्रालयले परिषद गठनलाई प्राथामिकतामा राख्न आग्रह गरे । ‘खाद्य ऐन मौलिक हक हो’ गौतमले भने, ‘कर्णाली प्रदेशले गठन गरिसक्यो । अन्य प्रदेशहरूले पनि काम अगाडि बढाएका छन । लुम्बिनीले पनि ढिलाई गर्न भएन ।’ कृषिको विकासको लागि परिषद अति आवश्यक छ ।
मन्त्रालयका भूमिस्रोत नक्सांकन महाशाखा प्रमुख अनिल मरासिनीले मन्त्रालयले ड्राफ्ट तयार गरेर आन्तरिक मामिला मन्त्रालय पठाइएको बताए । संघीय सरकारले नियमावली नबनाउदा प्रदेश स्तरीय परिषद गठनमा समस्या भएको बताए । खाद्य अधिकार तथा खाद्य सम्प्रभुतासम्बन्धी ऐन को कार्यान्वयनका लागि फियानले काम गर्दै आएको छ ।