आउँदो ५ वर्ष एमालेले सशक्त प्रतिपक्षको भूमिका खेल्ने विष्टले बताए तर अरु दलले सरकार बनाउन नसकेर बाध्यात्मक परिस्थिति आएमा संसदीय मूल्यमान्यता अनुसार नेतृत्वका लागि पहल गर्न पनि पछि नहट्ने स्पष्ट पारे ।

अरु दलले सरकार बनाउन नसकेर बाध्यात्मक अवस्था आएमा एमाले जिम्मेवारीबाट पन्छिन नसक्ने पनि विष्टले स्पष्ट पारेका छन् । ‘हामीलाई प्रतिपक्षमा बस्ने जनताको म्यान्डेट हो । त्यसैले सत्तामा बस्नका लागि अवान्छित गतिविधि गर्ने पक्षमा छैनौं, सरकार निर्माणका लागि एमालेलाई हतारो छैन तर बाध्यात्मक परिस्थिति आयो भने लोकतान्त्रिक मूल्यमान्यता अनुसार नेतृत्व लिन पहल पनि गर्छौं,’ विष्टले भने ।

निर्वाचनले वाम आन्दोलन, राष्ट्र र जनताको हितका लागि महत्त्वपूर्ण सन्देश दिएको उनले बताए । एमालेलाई कमजोर बनाउन चौतर्फी घेराबन्दी भए पनि जनताले एमालेलाई समानुपातिकमा पहिलो पार्टीको रूपमा अनुमोदन गरेको भन्दै मतदातालाई धन्यवाद दिए । वाम पार्टीको नामबाट राष्ट्रिय स्वाधिनताको हितविपरीत लाग्ने तथा दक्षिणपन्थीसँग गठबन्धन गर्नेहरूसँग गठबन्धन गरेर सरकार बनाउन आफूहरू नलाग्ने उनले बताए ।

चुनावबाट कसैको बहुमत नआएकाले आउँदो ५ वर्ष मुलुकमा अस्थिरता भइरहने र अर्थतन्त्र संकटमा पर्नसक्ने भन्दै एमालेले जिम्मेवार प्रतिपक्षको भूमिका खेल्ने उनले बताए ।