बुटवल । बुटवल उपमहानगरपालिका वडा नं. १० रामनगरस्थित बुटवल कालिका क्याम्पसको सुविधासम्पन्न भवनको उद्घाटन गरिएको छ । झण्डै १५ करोड रुपैयां लागतमा निर्माण गरिएको पांच तलाको ६० कोठे उक्त भवनको पुर्व अर्थमन्त्री एवं रुपन्देही क्षेत्र नं. २ का प्रतिनिधिसभा सदस्य विष्णु पौडेलले उद्घाटन गरे । क्याम्पसको नवौं वार्षिकउत्सव एवं अभिभावक दिवसको अवसरमा आयोजित कार्यक्रममा बोल्दै प्रमुख अतिथी पौडेलले स्थापनाको ९ वर्षको छोटो अवधीमै बुटवल कालिका क्याम्पसले मुलुकमै उत्कृष्टता हासिल गरेको उल्लेख गर्दै यो सिंगो रुपन्देहीकै गौरबको विषय भएको बताए ।
कार्यक्रममा लुम्बिनी प्रदेश सरकारका पुर्व मन्त्री एवं प्रदेशसभा सदस्य भोजप्रसाद श्रेष्ठले कालिका क्याम्पसले प्राप्त गरेको सफलता सिंगो बुटवलको सफलतासंग जोडिएको उल्लेख गर्दै क्याम्पसको अहिलेको उचाईलाई कहिल्यै कमि हुन नदिन आग्रह गरे । कार्यक्रममा क्याम्पस प्रमुख घनश्याम पाठकले २०७० सालमा प्लस टु उत्तिर्ण विद्यार्थीहरुको आग्रहपछि संचालन गरिएको क्याम्पसमा हाल करिब ३ हजार विद्यार्थी अध्ययनरत रहेको बताए । २०७० सालमा ३५ जना विद्यार्थीबाट बिबिएस कक्षा संचालन गरिएको क्याम्पसमा हाल बिबिएसमा २ हजार ४ सय ८७, बिसिएमा १ सय ६६ र बिएडमा ३ सय २ जना विद्यार्थी अध्ययनरत छन् ।
क्याम्पस प्रमुख पाठकले रामनगरस्थित कालिका मावनज्ञान माविको १० कठ्ठा जग्गामा रहेको क्याम्पसमा कम्प्युटर ल्याब, चमेना गृह, प्रदेश स्तरिय पुस्तकालय लगायतका संरचना तयार गरिएको जानकारी दिए । सामुदायिक तर्फ सबैभन्दा कान्छो रहेको क्याम्पसले बिसिएमा दुईपटक नेपाल प्रथम सहित शतप्रतिशत विद्यार्थी पास गराउन सफल भएको पाठकले बताए । क्याम्पसका कार्यवाहक अध्यक्ष अर्जुनमान सैंजुले क्याम्पसले अब छिटै बीएसस्सी सीएसआईटी, बीबीए र एमबीएस कक्षा संचालन गर्ने तयारी गरेको बताए ।