भैरहवा । हिन्दुहरुको दोस्रो महान पर्व तिहार भाइटिकासँगै सकिएको छ । तिहारको समापन सँगै रुपन्देहीको भैरहवा आसपास छठपर्वको तयारी सुरु भएको छ । सुर्यको उपासना गरी मनाइने छठ पर्व भैरहवा तथा आसपासका वासिन्दाले २ ठाँउमा विधिवत रुपमा मनाउदै आएका छन । ५० बर्ष पहिलै देखि नेपाली सेनाको काली भक्ती गणमा अवस्थित छठमाई पोखरीमा र भैरहवा उद्योगपुरी हनुमानमन्दिरमा स्थित पोखरीमा समेत केही वर्ष देखि छठको पूजा गरिदै आएको छ ।
कार्तिक शुक्ल पक्षको चौथी तिथि आजको दिनबाट छठपर्व विधिवतरूपमा सुरु हुन्छ । पूजाका लागि छठ स्थलमा सरसफाई तथा सजावटका काम भइरहेका छन, वेदी बनाउने र ठाँउ सुरक्षित गर्न परिवारले पहिलै नै व्यवस्थापन गरिरहेका छन । छठघाटको व्यवस्थापन र सजावटको काम तिब्र गतिमा भइरहेको छ । विगतका बर्षको भन्दा पनि यस बर्ष अझ आकर्षक रुपमा छठघाटलाई सजाउने काम भइरहेको छ । छठघाटको सरसफाइ , सजावट र व्यवस्थापनमा समिति लागेको छ , काम तिब्र गतिमा भइरहेको छ ।
समितिले छठ पूजाका दिन छठघाटमा ब्रतालु ,दर्शनार्थी र भक्तजनहरुको सहजता र सुरक्षाका बारेमा छलफल समेत गरेको छ । दीपावली सकिएसँगै तराई– मधेसवासी छठ पूजाका सामग्रीको जोहोका लागि किनमेलमा व्यस्त देखिएका छन् । तराई–मधेसका प्रमुख बजारसाथ साथै सिमापरि पनि छठ पूजाका लागि चाहिने सामग्री, हरिया तरकारी र फलफूल किन्नेको चहलपहल बढेको छ । खासगरी छठ पूजामा छठी मातालाई अर्पण गरिने प्रसादमा स्याउ, केरा, सुन्तला, पानी भएको नरिवल, उखु, हरियो तरकारी, सिङ्गडा, मुला, अदुवाको बोट त्यस्तै माटाका भाडो तथा बाँसका सामग्री खरिद समेत गरिन्छ । यि सामान किन्न भैरहवाको मुख्यबजार साथै भारतमा समेत किनमेलका लागि पुग्ने गरेका छन । मूलतः तराईवासी र मैथिल समाजले मनाउने विशेष चाडको रुपमा रहेको यो पर्व भैरहवा क्षेत्रका वासिन्दाले पनि मनाउने क्रम बढ्दो छ ।
