राजमार्ग छेउँमै उपमहानगर मातहत रहेको करिब दुई विगाहा क्षेत्रलाई संरक्षण गर्दै व्यवस्थित स्मृति पार्क निर्माण गरिएको हो।

जित बहादुर पुन महेन्द्र राजमार्ग निर्माण भइरहेको बेला त्यसमा काम गर्न भन्दै पुनका बुबा छोराछोरीलाई लिएर बुटवलमा आएका थिए। बाबुसंगै जितबहादुर र उनका दुई दाजुभाई पनि बुटवलमा आएर काम गरेका थिए। जितबहादुरले सडक निर्माणमा काम गर्न बातावरण नभएपछि ०३० को दशकमा प्लाई उद्योगमा काम सुरु गरेका थिए।

उद्योगमा काम गर्दै जनवादी गीत संगीतमार्फत सचेतना फैलाउने र राजनीतिक अधिकार प्राप्तिको आन्दोलनमा जनमत जुटाउने काममा पुनले त्यसबेला नेतृत्वदायी भूमिका निर्वाह गरेका थिए।

पुनकै सक्रियतामा यसक्षेत्रमा जनवादी सांस्कृतिक क्रान्ति, राजनीतिक तथा नागरिक अधिकार प्राप्तिको आन्दोलनका लागि संगठन निर्माण, श्रमज्योति क्लब गठन गर्दै त्यसैमार्फत राजनीतिक चेतनाको अभियान सञ्चालन गरिएको पुनले नै संगठित गरेका एमाले नेता डिलबहादुर आचार्यले बताए।

०४३ सालमा म्यानेन्जाइटिस भएर पुनको निधन भएको थियो । त्यसअघि पुनकी पत्नीको सुत्केरी हुनेक्रममा प्रसव पीडाकै बीचमा बच्चा जन्मन नसकेर निधन भएको थियो । पुनका भाईबुहारी र भतिजाभतिजी हाल पार्क रहेको स्थान नजिकै बस्दै अएका छन् । पुनका बाबु जो राजमार्ग निर्माणका क्रममा आउनुभएको थियो उहाँको चौपारीमा आराम गरिरहेकै बेलामा निधन भएको बताइएको छ ।