राष्ट्रिय जनमोर्चाको भूमिगत मोर्चा मानिने नेपाल कम्युनिष्ट पार्टी मसालबाट अलग भएको समूहले नेकपा मशाललाई ब्युंताएको छ । मसालको असन्तुष्ट समूहको लुम्बिनीमा सम्पन्न विशेष महाधिवेशनले नेकपा मशालका रुपमा पार्टीलाई अघि बढाउने निर्णय गरेको विहिबार बुटवलमा आयोजित पत्रकार सम्मेलनमा जानकारी गराएको हो । महाधिवेशनले सन्तबहादुर नेपाली महासचिव र रामबहादुर बुढा प्रवक्ता रहेको केन्द्रीय समिति निर्वाचित गरेको छ ।

जसमा २५ पूर्ण सदस्य र १० वैकल्पिक गरी ३५ सदस्य रहेको सो पार्टीले जनाएको छ ।
महासचिव नेपालीले मोहनविक्रम सिंह नेतृत्वको नेकपा मसाल दक्षिणपन्थी संशोधनवादी भएकाले पार्टीबाट विद्रोह गरि मशाललाई व्यूँताउनुपरेको बताए । मसालका महामन्त्री मोहनविक्रम सिंह र नेता चित्रबहादुर केसीलाई पार्टीबाट निष्काशन गरिएको उनले दाबी गरे ।

राष्ट्रिय जनमोर्चा हाल सत्ता गठबन्धनमा रहेपनि विद्रोही संगठन गठबन्धनमा रहेको र आसन्न प्रतिनिधिसभा र प्रदेशसभा निर्वाचनमा पनि भाग नलिने निर्णय गरेको जनाएको छ । नेपालीका अनुसार मशालको पार्टीको मूल संरचना भूमिगत रहने तर जिल्लास्तरका नेता खुला रहने छन् ।
पार्टी पोलिटब्युरो सदस्यहरु कृष्णराज पौडेलले बागलुङ, अर्घाखांची, प्यूठानसहित ४० भन्दा बढी जिल्लामा पार्टीको संगठन बनेको दावी गरे । महाधिवेशनले पार्टीको सहयोगी संगठनको रुपमा रहेको जातीय समता समाजलाई विघटन गरेको छ ।

स्थानीय तह निर्वाचनमा विजयी जनप्रतिनिधिहरुसमेत राष्ट्रिय जनमोर्चाका ५० प्रतिशत नेता कार्यकर्ता आफ्नो पक्षमा रहेको महासचिव नेपालीको दाबी छ ।