भारतको नयाँ संसद् भवनमा राखिएको ‘अखण्ड भारत’ को भित्तेचित्रमा नेपालका कपिलवस्तु र लुम्बिनी पनि समेटिएका छन्। उक्त भित्तेचित्रलाई लिएर देशभर विरोध भइरहँदा परराष्ट्र मन्त्री एनपी साउदले भने नेपाल सरकारलाई यसबारे जानकारी नै नभएको बताएका छन्।
भारतीय सञ्चारमाध्यम आजतककी पत्रकारले ‘नेपालको भूभाग पनि समेटिएको अखण्ड भारतको भित्तेचित्र भारतीय संसद् भवनमा राखिएको छ। अखण्ड भारतले नेपालको सार्वभौमसत्तालाई हनन गर्ने भन्दै विरोध पनि भइरहेको छ। यसबारे थुप्रै नेताले नेपालका प्रधानमन्त्रीले भारतका प्रधानमन्त्रीसँग यो मुद्दा उठाउनुपर्ने भनेका थिए। के यो मुद्दा उठ्यो? उठेन भने पनि यसमा नेपालको धारणा के छ’ भनेर प्रश्न गरेकी थिइन्।
जवाफमा मन्त्री साउदले भित्तेचित्रबारे आफू (सरकार)लाई थाहा नभएको बताए। “हेर्नुस्, यो मुराल (भित्तेचित्र)को कुरा हामीलाई जानकारी छैन। र, जुन कुरा हाम्रो जानकारीमा छैन, त्यसबारे भारतले नै आफ्नातर्फबाट बोल्छ,” उनले भने।
