हदबन्दीभन्दा बढी जग्गा र सम्पत्ति देखिएको भन्दै मालपोत कार्यालयले तिलोत्तमा नगरपालिका १७ कोटिहवास्थित पाँचतारे होटल टाइगर प्यालेसकोसबै जग्गा रोक्का गरेको छ ।
त्यस्तै होटलका संरचना सरकारी जग्गामा बनेको भन्दै भत्काउन जिल्ला अदालतले आदेश दिइसकेको छ । मालपोत र अदालतको पेलानपछि होटलमा गरिएको प्राइम बैंकको साढे दुई अर्ब लगानी संकटमा परेको छ ।
५ अर्ब रुपैयाँभन्दा बढी लगानी भएको रिसोर्टमा प्राइम बैंकले साढे २ अर्ब बढी लगानी गरेको थियो । होटलमा विदेशी कम्पनीले समेत लगानी गरेको छ । त्यसैले होटललाई विवादमा पारेर लगानीकर्तालाई हतोत्साही बनाएको भन्दै व्यवसायीहरुले यसको निष्पक्ष छानबिनको माग गरेका छन् ।
रिसोर्ट सञ्चालन गरेको सिल्भर हेरिटेज इन्भेस्टमेन्ट प्रालिको नाममा रहेको १३ बिगा १५ कट्ठा जग्गा मालपोत कार्यालयले बिहीबार रोक्का गरेको थियो । यससँगै प्राइम बैंकको लगानी असुली प्रभावित हुने भएको छ ।
मालपोत कार्यालय भैरहवाका प्रमुख कुमार आचार्यले मूल कम्पनी र टाइगर प्यालेसका नाममा रहेको सबै जग्गा प्रारम्भिक छानबिनमा हदबन्दीभन्दा बढी देखिएकाले रोक्का राखेर विस्तृत छानबिन सुरु गरिएको बताए ।
