सम्मेलनमा विश्वका दर्जनौं देशलाई सहभागिताका लागि बोलाइने छ । यसले लुम्बिनी क्षेत्रको पर्यटन प्रबद्र्धन, विकास प्रचारप्रसारमा सहयोग पुग्ने विकास कोषले जनाएको छ । विगतमा भएका सम्मेलनले लुम्बिनीको गरिमालाई विश्वबजारमा थप उचाईम पुर्याएको थियो । कोरोना महामारीका कारण पछिल्ला वर्षमा उक्त सम्मेलन रोकिएको छ ।

खासगरी बौद्धिष्ट मुलुकहरुलाई प्राथमिकतामा राखेर शिखर सम्मेलनमा बोलाइने छ । नेपाल सरकारका उच्च अधिकारीसहित विश्वका उच्च तहका अधिकारी सम्मेलनमा सहभागी हुने सदस्यसचिव शाक्यले जनाए । भारत, चीन, श्रीलंका, म्यानमार, थाइल्याण्ड लगायतका मुलुकलाई निमन्त्रणाको तयारी पनि गरिएको छ । तयारी स्वरुप कोषको बैठकले उपाध्यक्ष अवधेशकुमार त्रिपाठीको नेतृत्वमा लुम्बिनी सरसफाइ अभियान सञ्चालन गर्ने निर्णय गरेको छ ।

संस्कृति, पर्यटन तथा नागरिक उड्डयन मन्त्री सुदन किराँतीको अध्यक्षतामा शुक्रबार बसेको कोषको बैठकले विगत केही वर्षदेखि रोकिएको अन्तर्राष्ट्रिय शान्ति पुरस्कार बौद्ध शिखर सम्मेलनकै अवसरमा वितरणका लागि प्रक्रियाअघि बढाउने निर्णय पनि गरेको छ ।

यस्तै बैठकले आगामी बुद्ध जयन्तीको अवसरमा बुद्ध संस्कृति अवलम्बन गर्ने सबैलाई निःशुल्क भिसा प्रदान गर्न नेपाल सरकारसँग पहल गर्ने निर्णय गरेको छ । बुद्ध जयन्ती मनाउन आउनका लागि बुद्ध संस्कृति भएका राष्ट्रलाई निःशुल्क भिसाका लागि पहलका लागि निर्णय गरिएको तर कुन–कुन मुलुक भनेर किटान भने गरिएको छैन ।

बैठकले लुम्बिनीमा हालै निर्मित अन्तर्राष्ट्रिय सभाहलमा केही दिन अघि परेको वर्षापछि पानी चुहिएकाले सम्बन्धित निर्माण कम्पनीलाई मर्मत गराउने निर्णय पनि भएको छ । अन्तर्राष्ट्रिय सभाहल गत वर्ष बुद्ध पूर्णिमाका दिन तत्कालीन प्रधानमन्त्री शेरबहादुर देउवाले उद्घाटन गरेका थिए । निर्माण कम्पनीले मर्मत गरेर समस्या समाधान नगर्दासम्म भुक्तानी प्रक्रिया रोक्का राख्ने निर्णय भएको कोषाध्यक्ष ढुण्डिराज भट्टराईले जानकारी दिए ।

यस्तै, बुद्ध जन्मस्थल लुम्बिनीमा बुद्ध जयन्तीको अवसर पारेर ‘लुम्बिनी जाऊँ’ टिकटक प्रतियोगिता पनि आयोजना गरिने भएको छ । लुम्बिनीको थप प्रचारप्रसार र पर्यटकीय प्रवद्र्धनका लागि टिकटक प्रतियोगिता आयोजना गर्न लागिएको हो । प्रतियोगितामा विजयीलाई पुरस्कारको निर्णय भने संस्कृति, पर्यटन तथा नागरिक उड्डयन मन्त्रालयले गर्नेछ ।