लुम्बिनी प्रदेशमा एमालेका लिला गिरी नेतृत्वको सरकारलाई दिएको समर्थन फिर्ता लिने भन्दै बसेको माओवादी संसदिय दलको बैठक विना निष्कर्ष टुंगिएको छ । दिनभर जसो छलफल चलिरहेपनि बैठकले कुनै पनि निर्णय लिन सकेन ।
सत्ताको मुख्य साझेदार नेकपा माओवादी केन्द्रले एमाले नेतृत्वको सरकारलाई दिएको समर्थन फिर्ता लिने भन्दै विहिबार दलको बैठक बोलाइएको थियो । तर समर्थन फिर्ता लिने वा यहि सरकारलाई निरन्तरता दिने विषयमा कुरा नमिल्दा बैठकले कुनै पनि निर्णय नगरेको हो ।
माओवादी संसदीय दलका नेता जोखबहादुर महराको अध्यक्षतामा बसेको बैठकले केन्द्रको निर्णय कुरेर थप निर्णय गर्ने भन्दै आज कुनै निर्णय नभएको उनको सचिवालयले जनाएको छ ।
संघको निर्देशन पछि मात्र लुम्बिनीमा समर्थन फिर्ता लिने बारे निर्णय लिईने माओवादीले जनाएको छ । केही सांसदहरुले तत्काल नयाँ सरकार बनाउँदा पनि आफूहरुले मुख्यमन्त्री नपाउने अवस्थामा अहिलेकै सरकारलाई निरन्तरता दिने आवाज उठेको छ । माओवादीका ११ सांसदमध्ये ४ जनाले अहिलेकै सरकार निरन्तरता दिनुपर्ने पक्षमा रहेको एक सांसदले बताए ।
आजको बैठकमा सरकारलाई दिएको समर्थन फिर्ता भन्दापनि माओवादीभित्रैकै विवादका विषय बढी उठेको माओवादी केन्द्रका एक नेताले बताए । लुम्बिनीमा संसदीय दलका नेता नै फेर्नेगरी असन्तुष्ट सांसदहरुले पार्टी केन्द्र र प्रदेश अध्यक्षलाई पत्र बुझाएको स्रोतले जनाएको छ ।
