गुल्मी– यहाँको मालिका गाउँपालिकाले आफ्नो प्रतीक चिन्ह (लोगो) बनाउनेलाई २५ हजार रुपैयाँ दिने जनाएको छ । गाउँपालिकाको पहिचान झल्किने गरी लोगो निर्माण गर्न लागेकाले इच्छुक व्यक्तिहरुका लागि सार्वजनिक रुपमा आह्वान गरेको हो ।
गाउँपालिकाले एक सूचना निकाल्दै प्रतीक चिन्ह बनाउनेलाई उक्त रकम दिने घोषणा गरेको छ । लोगो निर्माण गर्दा गाउँपालिकाको नाम र नेपालको झण्डा अनिवार्य, गाउँपालिकाको पहिचान, विशेषता, भाव लगायत विषय उल्लेख हुनुपर्ने सूचनामा उल्लेख गरिएको छ ।
सूचना प्रकाशित भएको मितिले २१ दिन भित्र लोगो बनाएर खामबन्दीमार्फत गाउँपालिकाको कार्यालयमा पठाउनु पर्ने जनाइएको छ । सूचना आइतबार निकालिएको हो । आइतबारदेखि २१ दिनभित्र पालिकालाई लोगो उपलब्ध गराइसक्नु पर्नेछ ।
छनोट समितिले उत्कृष्ट लोगो छनोट गर्ने र छनोटमा परेका डिजाइनकर्तालाई गाउँपालिकाले २५ हजार रुपैयाँ नगद पुरस्कार र सम्मानपत्र प्रदान गरिने सूचनामा उल्लेख छ । लोगो सामूहिक रुपमा बनाउन नपाइने गाउँपालिकाले जनाएको छ ।
