नेपाल सरकार र भारतको एक्सपोर्ट इम्पोर्ट (एक्जिम) बैंकको ऋण सम्झौतामा २०७५ माघ १४ गते सम्झौता भई सडक निर्माण सुरु भएको हो । घोराहीको बबई खोलादेखि तुलसीपुरसम्म २८ दशमलव १९ किलोमिटर सडक चार लेन तथा दुई लेन बन्दैछ । बबईदेखि घोराही बजारसम्म ६.५३ किलोमिटर दुई लेन तथा घोराहीदेखि थापाचोक सर्रा ४.०५ किलोमिटर चार लेन, थापा चोकदेखि नारायणपुर ३.५ किलोमिटर दुई लेन, नारायणपुरदेखि खैरा २.१ किलोमिटर चार लेन, खैरादेखि दूधरास ३.७ किलोमिटर दुई लेन र दुधरासदेखि तुलसीपुरसम्म ८.३१ किलोमिटर चार लेन निर्माण गर्ने योजना छ ।

सुरुमा २०७७ वैशाख २९ सम्म सडक निर्माण गर्नुपर्ने शर्त थियो । समयमा सम्पन्न नभएपछि पटक पटक (२०७८ जेठ ६, साउन २७, पुस १९ सम्म सक्ने गरी) म्याद थप भयो । म्याद थप्दा पनि प्रगति नभएको सडकलाई २०७९ वैशाख २९ सम्म म्याद थपियो । अहिले फेरि २०८० असार ३१ गतेसम्म म्याद थपिएको थियो । म्याद थप भए पनि भौतिक प्रगति नभएपछि सडक आयोजना कार्यालय ठेक्का तोड्ने प्रक्रियामा अघि बढेको हो ।

सडक निर्माणको म्याद पाँच पटक थप्दा पनि भौतिक प्रगति ९ दशमलव ६९ र आर्थिक प्रगति १४ दशमलव २३ प्रतिशत मात्रै भएको ‘फोरलेन’ सडक आयोजना कार्यालय लमहीका प्रमुख आशिष थापाले बताए । जति म्याद थप्दा पनि सन्तोषजनक काम नभएका कारण उचित निकास खोज्नुपर्ने अवस्था आएको उनले बताए । सडक निर्माणको बजेट १ करोड २१ लाख ८२ हजार ३ सय १ अमेरिकी डलर रहेको छ ।