बुटवल । घटना भएको एक महिना सम्म चुपचुप राखी यत्तिकै थामथुम पार्न खोजिएको रुपन्देहीको अर्घाखाँची सिमेन्टमा मजदुर मृत्यु प्रकरण बाहिर आए संगै परिबारले क्षतिपूर्ति पाएका छन् ।
रुपन्देहीको सियारी गाउँपालिका २ मा रहेको अर्घाखाँची सिमेन्ट उद्योगमा गत माघ १६ गते त्यहाँ कार्यरत ४ जना मजदुरको मृत्यु भएको थियो । प्रहरीले घटनाको मुचुल्का गरेको भएपनि घटना बाहिर सार्वजनिक नगरी यत्तिकै थामथुम पार्न खोजेको थियो । सिमानाका बाट कुखुरा र चल्ला बरामद गर्दा मिडियाबाजी गर्ने रुपन्देही प्रहरीले ४ जना मजुदरको ज्यान गएको घटना गुपचुप राखेको आशंका बढेको थियो । तर मिडियामा एक महिना ढिलो गरी समाचार सार्वजनिक भएपछि चार कामदारका परिबारले प्रति परिबार १० लाख दरले क्षतिपूर्ति पाएका हुन ।
अर्घाखाँची सिमेन्ट उद्योगका महाप्रबन्धक उद्धव कार्कीले विमा बापतको रकम र सरकारी मापदण्ड अनुरुपको सुविधा माथी उद्योगले ३ लाख थप गरी प्रति परिबारलाई १०/१० लाख रुपैया उपलब्ध गराइएको बताए ।
गत माघ १६ गते भएको घटनामा भारतको उत्तरप्रदेश फतेहपुर जिल्ला ग्रामका ५० बर्षिय जितेन्द्र कुमार, विहारको गोपालगञ्ज ग्रामका २७ बर्षिय शशिकान्त कुमार कुशवाह, समस्तीपुर ग्रामका ४८ बर्षिय श्रीराम सिंह र रुपन्देहीको कोटहीमाई ४ का ३८ बर्षिय अंगद हरिजनको मृत्यु भएको थियो । उद्योगको कोल मिलको व्याग हाउसमा कोइला अत्यधिक तातेका कारण भएको आगलागीमा उनीहरुको मृत्यु भएको थियो ।
रुपन्देही प्रहरीका अनुसार भैरहवा स्थित युनिर्भसल शिक्षण अस्पतालमा उनीहरुको उपचारका क्रममा मृत्यु भएको थियो ।
सोही घटनामा २ जना घाईते समेत भएका थिए । घाईते हुनेमा भारतको उत्तरप्रदेश महाराजगन्जका ४३ बर्षिय शिवलाल हरिजन र विहारका ४१ बर्षिय राजकिशोर यादव छन् । उनीहरु अहिले निको भइसेको छन् ।