बुटवल । राष्ट्रपती निर्वाचनका लागि बनेको नयाँ सत्ता गठबन्धनका कारण लुम्बिनी प्रदेश सरकार संकटमा पर्ने भएको छ ।
नयाँ सत्तागठबन्धन बनेकाले लुम्बिनी प्रदेश सरकारलाई विश्वासको मत दिएका दुई पार्टीले विश्वासको मत फिर्ता लिने भएको छन् । जसका कारण लुम्बिनी प्रदेश सरकार संकटमा परेको हो ।
मुख्यमन्त्री लिला गिरीलाई विश्वासको मत दिएका नागरिक उन्मुक्ति पार्टी र लोकतान्त्रिक समाजबादी पार्टीले विश्वासको मत फिर्ता लिने भएका हुन । प्रदेश सभामा उन्मुक्ति पार्टीका ४ र लोसपाका ३ सांसद छन् ।
नागरिक उन्मुक्ति तथा ३ सांसद रहेको लोसपाले पुस २७ मा हस्ताक्षर गरेका थिए भने माघ ५ मा मुख्यमन्त्री लीला गिरीलाई विश्वासको मत दिएका थिए ।
लुम्बिनी प्रदेश शभाको आज बैठक बस्ने र दुवै दलले विश्वासको मत फिर्ता लिने बताएका छन् ।
नागरिक उन्मुक्तिका प्रमुख सचेतक राजकुमार चौधरीले सरकारलाई दिएको विश्वासको मत र्फिता लिने उनले बताए ।
त्यस्तै लोसपाको संसदीय दलका नेता सन्तोष पाण्डेले नयाँ समीकरणअनुसार जाने बताउँदै सरकारलाई दिएको समर्थन आज दिउँसो बस्ने बैठकमा फिर्ता लिने बताए ।
संघीय सरकारमा सरकारबाट बाहिरिएको राप्रपाले भने सरकारलाई दिएको विश्वासको मत बारे अझै निर्णय गरिसकेको छैन् ।
८७ सदस्यीय प्रदेशसभामा एमाले नेता लीला गिरी ७ दलका ५६ र दुई स्वतन्त्र सांसदको हस्ताक्षर सहित मुख्यमन्त्री बनेका थिए । तर, दुई महिना पूरा नहुँदै मुख्यमन्त्री गिरी संकटमा परेका छन् ।
प्रदेशमा पहिलो दल रहेको एमालेसँग २९ तथा माओवादीसँग १० सांसद रहेका छन । यसैगरी सरकारलाई साथ दिएको राप्रपाका ४, जनमतका ३ र जसपाका ३ सांसद छन । त्यस्तै जसपाले पनि सरकारबाट बाहिरिने विषयमा अझै कुनै निर्णय नभएको बताएका छन् । जसपा प्रदेश अध्यक्ष अशोक यादवले फागुन २५ पछि मात्र सरकारका बारेमा निर्णय लिने बताए । जसपाका भण्डारीलाल अहिले मन्त्री छन । त्यस्तै जनमतले पनि सरकारलाई दिएको समर्थन फिर्ता बारे अझै निर्णय भइनसकेको बताएको छ । जनमतका सांसद तथा सामाजिक विकासमन्त्री चन्द्रकेश गुप्ताले २५ गते अगाडि कुनै निर्णय लिने विषयमा पार्टीमा छलफल नभएको बताए ।
माओवादी केन्द्र संसदीय दलका नेता जोखबहादुर महराले नयाँ गठबन्धनअनुसार दलहरुसँग औपचारिक तथा अनौपचारिक संवाद भइरहेको बताए ।