नेपालगन्ज । बाँकेको डुडुवामा रहेको जयेन्दु बाल सुधारगृहमा सुरक्षाको उचित व्यवस्था नहुँदा बाल सुधारगृहमा राखिएका चार जना फरार भएका छन् ।
अपराधमा मुछिएका बालकलाई उक्त बाल सुधार गृहमा राख्ने गरिएको छ । जबरजस्ती करणीका तीन जना र कर्तब्य ज्यान मुद्दाका एक जना विहीवार साँझ फरार भएको प्रहरीले जनाएको छ । सुधार गृहबाट जबरजस्ती मुद्दाका धर्म थापा, कृष्ण नगरकोटी र अविनाश पुन तथा कर्तब्य ज्यान मुद्दाका पुरन चौधरी फरार भएका हुन् ।
फरार रहेका बालकको खोजी जारी रहेको बाँके प्रहरीले जनाएको छ । बन्दी गृहमा रहेका बालक फरार भएपछि त्यसको छानबिन गर्न जिल्ला प्रशासन कार्यालयले सहायक प्रमुख जिल्ला अधिकारी टोपेन्द्र केसीको संयोजकत्वमा समिति समेत गठन गरिएको छ। समितिमा अनुसन्धान विभाग, प्रहरी र कारागारका प्रतिनिधी छन् ।
बाँके प्रहरीका प्रवक्ता डीएसपी रामप्रसाद घर्तिले फरार रहेका बालकको खोजी भइरहे पनि फेला नपरेको जानकारी दिए ।
