उपमहानगरपालिकाले सार्वजनिक सुनुवाइ सम्पन्न गरेको छ । नगरले प्रदान गर्ने सेवा प्रवाहका बारेमा बुटवल ७ नन्दिनी गौशालामा कार्यक्रम सम्पन्न गरेको हो । कार्यक्रममा विभिन्न वडाका स्थानीय सेवाग्राहीहरुले शिक्षा, स्वास्थ्य खानेपानी ,सरसफाइ,विद्युतका पोलको समस्याहरु रहेको बताएका छन । शुद्ध खानेपानी खान नपाएको , फोहोरमैलाको उचित व्यवस्थापन नभएको,लागूपदार्थ दुर्व्यसनीले समाज अशान्त भएको र युवाहरू दुर्व्यसनीमा फस्ने गरेको तर त्यसतर्फ नगरको खासै चासो नपुगेको गुनासो गरे । त्यस्तै खोला खोल्सी नालाहरुको उचित व्यवस्थापन हुन नसकेको सेवाग्राहीको गुनासो छ ।
सेवाग्राहीहरुले नगरपालिकामा करका विषयमा र अन्य विद्युत खानेपानी, अस्पतालमा छिटो छरितोरुपबाट अझै पनि सेवा लिन नसकेको बताएका थिए ।
कार्यक्रममा उठेका प्रश्नहरुको जवाफ दिँदै बुटवल उपमहानगरपालिका नगरप्रमुख खेलराज पाण्डेले बुटवललाई समृद्ध बुटवल र बस्न योग्य बुटवल बनाउनका लागि आफूहरुले योजनाका साथ काम अघि बढाएको दावी गर्नुभयो । समानता, स्वाभिमान र अवसर बस्नयोग्य बुटवल शहर भन्ने नाराका साथ आफूहरुले सक्दो प्रयास गरेर नीति तथा योजना र त्यही अनुसारको बजेट ल्याएको उहाँको दावी थियो । ३ तहका सरकारमध्ये स्थानीय सरकार नागरिकको सरकार भएको बताउँदै पाण्डेले धेरै उत्कृष्ट र दीर्घकालीन कामहरु सम्पन्न भएको बताउँदै बाँकी रहेको अधुरा कामहरु सम्पन्न गर्नेतर्फ ध्यान दिने प्रतिवद्धता जनाउनुभयो ।
त्यस्तै बुटवल उपमहानगरपालिका उपप्रमुख सावित्रा देवी अर्यालले बुटवल उपमहानगर पालिकाले शिक्षा, स्वास्थ्य, रोजगारी र उद्यमलाई जोडेर बुटवलको विकासमा निरन्तर लागिरहेको बताउँदै नगरबासीको साथ र सहयोगको अपेक्षा गर्नुभयो ।
कार्यक्रममा ईलाका प्रशासन कार्यालय बुटवलका प्रतिनीधि शुरेश भण्डारी, सडक सुरक्षा तथा ट्राफिक व्यवस्थापन कार्यालय बुटवलका प्रमुख दिपेश बस्यालले नागरिकलाई सेवा प्रवाहमा सहज हुने गरि काम गर्ने प्रतिवद्धता व्यक्त गर्नुभएको थियो ।
त्यस्तै राजनीतिक दलको तर्फबाट राष्ट्रिय प्रजातन्त्र पार्टी बुटवल समिति अध्यक्ष लक्ष्मण श्रेष्ठ ,राष्ट्रिय स्वतन्त्र पार्टी बुटवलका प्रतिनिधि नरेन्द्र पाण्डेले नगरको विकासका काममा सहयोग गर्ने बताएका थिए ।
सार्वजनिक सुनुवाई कार्यक्रममा विभिन्न राजनैतिक दलका प्रतिनिधिहरु , सरकारी तथा गैर सरकारी संघ संस्थाका प्रतिनिधिहरु , सुरक्षा क्षेत्रका प्रतिनिधि वडा अध्यक्ष, जनप्रतिनिधि, टोल विकास समितिका अध्यक्ष ,सर्वसाधारण नागरिकहरुको तथा नगरपालिकाका शाखा प्रमुखहरु र पत्रकारहरुको उपस्थिति रहेको थियो ।
कार्यक्रममा सार्वजनिक सुनुवाइका लागि तयार पारिएको प्रतिवेदन रेडियो मुक्तीका स्टेशन म्यानेजर कल्पना तिवारीले प्रस्तुत गर्नुभएको थियो भने सञ्चालन रेडियोका समाचार प्रमुख अस्मिना पाण्डेले गर्नुभएको थियो । सार्वजनिक सुनुवाइ कार्यक्रमको सहजीकरण रेडियो मुक्ति बुटवलले गरेको थियो।
