बुटवल ।
समाजमा हरेक पुस्ताले केही व्यक्तित्वहरू जन्माउँछ, जसले आफ्नो जीवनलाई केवल व्यक्तिगत सफलतामा सीमित नराखी सामूहिक उन्नतिको यात्रासँग जोड्छन् । बागलुङको विकट गाउँबाट सुरु भएको एउटा साधारण जीवनयात्रा रुपन्देहीको औद्योगिक, सामाजिक र अब राजनीतिक नेतृत्वसम्म आइपुग्दा एउटा प्रेरणादायी कथामा रूपान्तरित भएको छ । यो कथा हो— चुन्नप्रसाद शर्मा पौडेलको, जो सफल व्यवसायीको पहिचानबाट पहिलो पटक प्रतिनिधिसभा उम्मेदवारका रूपमा सार्वजनिक जीवनको नयाँ अध्यायमा प्रवेश गर्दैछन् ।
गाउँको माटोबाट सुरु भएको यात्रा
वि.सं. २०२२ असार २७ गते बागलुङको हुग्दिशिरमा जन्मिएका चुन्नप्रसाद शर्मा पौडेल सामान्य परिवारमा हुर्किए । बाबु पशुपति शर्मा र आमा पार्वती पौडेल शर्माबाट उनले अनुशासन, परिश्रम र नैतिकताको संस्कार पाए । ग्रामीण परिवेशको अभावबीच पनि शिक्षा नै भविष्यको आधार हो भन्ने विश्वासले उनलाई अध्ययनतर्फ अघि बढायो।
प्रारम्भिक शिक्षा गुल्मीको शान्तिपुरबाट सुरु गरेका उनले उच्च शिक्षाका लागि भारतको बनारससम्मको यात्रा गरे । बनारसको आध्यात्मिक र बौद्धिक वातावरणले उनको सोचलाई फराकिलो बनायो । जीवन केवल व्यक्तिगत उन्नतिका लागि होइन, समाजप्रतिको जिम्मेवारी पूरा गर्ने माध्यम पनि हुनुपर्छ भन्ने चेतना त्यहीँ विकसित भयो।
शिक्षणबाट उद्यमतर्फ मोडिएको जीवन
शिक्षा पूरा गरी स्वदेश फर्किएपछि उनले वि.सं. २०३८ सालमा गाउँकै विद्यालयमा शिक्षक बनेर पेशागत जीवन सुरु गरे । शिक्षण पेशामा रहँदा उनले शिक्षा परिवर्तनको शक्तिशाली माध्यम भए पनि आर्थिक सशक्तिकरण बिना समाजको समग्र विकास सम्भव नहुने अनुभव गरे।
करिब चार वर्षको अध्यापनपछि उनले नयाँ बाटो रोजे— उद्योग र व्यवसाय। यही निर्णयले उनको जीवनको दिशा मात्र होइन, हजारौँ मानिसको भविष्य पनि परिवर्तन गर्यो।
सानो पसलदेखि औद्योगिक समूहसम्म
वि.सं. २०४९ सालमा रुपन्देहीको संगमपथमा सानो पसलबाट सुरु भएको उनको व्यावसायिक यात्रा आज बहुआयामिक औद्योगिक समूहमा परिणत भएको छ। निरन्तर परिश्रम, जोखिम लिन सक्ने साहस र दीर्घदृष्टिका कारण उनले व्यवसायलाई विस्तार गर्दै लगे।
उनको नेतृत्वमा स्थापित यशोदा फुड्स नेपाली खाद्य उद्योग क्षेत्रमा उल्लेखनीय ब्राण्डका रूपमा स्थापित भएको छ। नुडल्स, स्न्याक्स तथा भुजिया उत्पादनमार्फत कम्पनीले छोटो समयमै ठूलो सफलता हासिल गरेको छ। सन् २०१७ मा स्थापना भएको कम्पनीले प्रत्येक वर्ष आम्दानीमा उल्लेखनीय वृद्धि गर्दै २०२५ मा ७ अर्ब ६८ करोड ९० लाख रुपैयाँ सञ्चालन आम्दानी हासिल गरेको तथ्याङ्क सार्वजनिक गरेको छ, जुन अघिल्लो वर्षको तुलनामा ३१ प्रतिशत वृद्धि हो।
उत्पादन विविधिकरण, आधुनिक व्यवस्थापन र बजार विस्तार रणनीतिका कारण कम्पनीको वृद्धि निरन्तर उकालो लागेको देखिन्छ। तिलोत्तमा–१५ स्थित उत्पादन केन्द्रबाट सञ्चालन भइरहेको उद्योगले नुडल्सको वार्षिक उत्पादन क्षमता ४२ हजार मेट्रिक टन र स्न्याक्स ४ हजार ५ सय मेट्रिक टन पुर्याएको छ।
रोजगारी सिर्जनाको आधार
पौडेलको व्यवसायिक यात्राको सबैभन्दा महत्वपूर्ण पक्ष रोजगारी सिर्जना हो। उनका विभिन्न उद्योगहरूमा पाँच हजारभन्दा बढी नेपालीले प्रत्यक्ष रोजगारी पाएका छन् भने हजारौँ परिवारको जीविकोपार्जनसँग उनका उद्योग जोडिएका छन्।
उनका लागि व्यवसाय केवल नाफाको माध्यम होइन, सामाजिक उत्तरदायित्व पूरा गर्ने साधन हो। यही सोचले उनलाई उद्योगी मात्र होइन, सामाजिक नेतृत्वका रूपमा पनि स्थापित गरेको छ।
स्वास्थ्य, पर्यटन र सामाजिक योगदान
उद्योग क्षेत्रसँगै उनले स्वास्थ्य र पर्यटन क्षेत्रमा पनि लगानी विस्तार गरेका छन्। बुटवल हस्पिटल प्रालिमार्फत स्वास्थ्य सेवामा पहुँच विस्तार गर्ने प्रयास गरिएको छ भने पाँचतारे स्तरको ह्यात प्यालेस होटल परियोजनाले क्षेत्रीय पर्यटन विकासमा योगदान पुर्याएको छ।
महामारी, प्राकृतिक विपत्ति वा सामाजिक संकटका बेला उनी अग्रपंक्तिमा उभिएको उदाहरण स्थानीयले स्मरण गर्छन्। एम्बुलेन्स सहयोग, राहत वितरण तथा सामाजिक अभियानहरूमा सक्रिय सहभागिताले उनको मानवीय पक्ष झल्काउँछ।
परिवार र व्यक्तिगत जीवन
वि.सं. २०४० सालमा उमादेवी शर्मासँग वैवाहिक जीवनमा बाँधिएका पौडेल हाल बुटवल उपमहानगरपालिका–११ मा बसोबास गर्छन्। छोराछोरी प्रशन्न, प्रशान्त र प्रतिमासहितको पारिवारिक जीवनलाई उनी आफ्नो शक्ति मान्छन्।
उनका अनुसार परिवारभित्रको सहकार्य र विश्वासले नै सार्वजनिक जिम्मेवारी सम्हाल्ने आत्मविश्वास प्रदान गर्छ। पारिवारिक मूल्य र सामाजिक उत्तरदायित्वबीच सन्तुलन कायम गर्नु नै जीवनको सफलता हो भन्ने उनको विश्वास छ।
व्यवसायबाट सार्वजनिक जीवनतर्फ
चार दशकभन्दा लामो व्यावसायिक अनुभवपछि पौडेल सार्वजनिक नीतिनिर्माणमा प्रत्यक्ष भूमिका खेल्ने निष्कर्षमा पुगेका छन्। उनका अनुसार उद्योगले हजारौँलाई रोजगारी दिन सक्छ, तर सही नीतिले सिंगो देशको भविष्य बदल्न सक्छ।
स्थानीय उत्पादन प्रवद्र्धन, स्वदेशमै रोजगारी सिर्जना, युवा उद्यमशीलता विकास, पारदर्शी शासन र महिलाको आर्थिक सशक्तिकरण उनका प्रमुख प्राथमिकता हुन्। विदेश पलायन भइरहेका युवालाई स्वदेशमै अवसर सिर्जना गर्नुपर्ने आवश्यकता उनले बारम्बार उठाउँदै आएका छन्।
पहिलो पटक निर्वाचन मैदानमा
नेपाली काँग्रेसका महासमिति सदस्य समेत रहेका चुन्नप्रसाद शर्मा पौडेललाई आसन्न प्रतिनिधिसभा निर्वाचनमा रुपन्देही क्षेत्र नं. २ बाट उम्मेदवार बनाइएको छ। लामो समय सामाजिक र व्यावसायिक क्षेत्रमा सक्रिय रहेपछि उनले पहिलो पटक प्रत्यक्ष राजनीतिक प्रतिस्पर्धामा पाइला टेकेका हुन्।
आफ्नो स्वभावलाई मिलनसार र समावेशी बताउँदै उनी भन्छन्, “म राजनीतिक रूपमा आस्थावान भए पनि सामाजिक र व्यावसायिक जीवनमा कहिल्यै विभेद गरेको छैन। सबैको साथ र सहयोग पाउने विश्वास छ।”
स्थानीय विश्लेषकहरूका अनुसार उनको व्यवसायिक सफलता, सामाजिक सक्रियता र सबै दलका समर्थकसँगको सम्बन्धले निर्वाचन यात्रालाई सहज बनाउन सक्ने आधार तयार गरेको छ।
सम्भावनाको कथा
चुन्नप्रसाद शर्मा पौडेलको जीवनकथा एउटा सन्देश हो— साधारण परिवेशबाट पनि असाधारण उपलब्धि हासिल गर्न सकिन्छ। शिक्षण, उद्योग, समाजसेवा र अब राजनीतिसम्मको उनको यात्रा निरन्तर परिवर्तन खोज्ने व्यक्तित्वको परिचायक बनेको छ।
उनको कथा केवल एक व्यक्तिको सफलता होइन; यो अवसर खोज्ने, जोखिम लिन सक्ने र समाजसँग जोडिएर अघि बढ्ने नेपाली सम्भावनाको कथा हो। अब प्रश्न केवल उनको व्यक्तिगत यात्राको छैन, बरु उनले सार्वजनिक नेतृत्वमा प्रवेश गरेपछि आफ्नो अनुभवलाई नीतिगत परिवर्तनमा कति रूपान्तरण गर्न सक्छन् भन्नेमा केन्द्रित भएको छ।
व्यवसायबाट समाज हुँदै राजनीतिसम्म आइपुगेको यो यात्रा आगामी दिनमा कस्तो मोड लिन्छ, त्यो समयले देखाउनेछ। तर यति निश्चित छ— हुग्दिशिरको माटोबाट सुरु भएको यात्रा अब राष्ट्रिय राजनीतितर्फ उन्मुख भइसकेको छ।
