अधिवेशनका प्रमुख अतिथि तथा अस्ट्रेलियाका लागि न्यु साउथ वेल्सका अवैतनिक महावाणिज्यदूत संजिव शर्माले सञ्जालले च्यारिटी कार्यक्रममार्फत सामाजिक क्षेत्रमा परोपकारी र अनुकरणीय काम गरेको उल्लेख गर्दै अन्य संस्थालाई समेत यस्तो कार्य अनुकरण गर्न आग्रह गर्नुभयो ।

कार्यक्रममा निवर्तमान अध्यक्ष दिवाकर काफ्लेले आफ्नो बार्षिक कार्यप्रगति प्रस्तुत गर्दै सञ्जालले कोभिड–१९ प्रभावितलाई राहत वितरण, यौन हिंसापीडित बालबालिकालाई सहयोग, क्यान्सरपीडित तथा भूकम्पपीडितलाई सहयोग, अनाथ आश्रममा रहेका फरक क्षमता भएका तथा सिमान्तकृत बालबालिकालाई शैक्षिक सामग्री वितरण गरिएको बताउनुभयो ।

काफ्लेले जिवनमा सबैभनदा ठुलो दान मानिने रक्तदान, स्वास्थ्य सामग्री सहयोग, उत्प्रेरणामूलक अभिमुखीकरण, साहित्यिक–सांस्कृतिक कार्यक्रम तथा हरितालिका तिजमिलन कार्यक्रम संगै  विभिन्न सामाजिक गतिविधि सम्पन्न गर्न सहयोग गर्ने सबैलाई धन्यबाद व्यक्त गर्नुभयो ।

उहाले आगामी दिनमा स्वदेश तथा विदेशका सरोकारवालासँग सहकार्य गर्दै सामाजिक कार्यलाई अझ सक्रिय बनाउने संस्थाको लक्ष्य रहेको बताउनुभयो।

कार्यक्रममा ओएनएफ अष्ट्रेलियाका अध्यक्ष केशव जोशी, एनआरएन अष्ट्रेलियाका संस्थापक अध्यक्ष मना केसी, पूर्वअध्यक्ष नन्दु गुरुङ, ग्रेटर सिड्नीका अध्यक्ष विष्णु हमाल, एनआरएन न्यु साउथ वेल्सका सचिव प्रताप पन्थी तथा सञ्जालका संरक्षकहरू राज खनाल, मुक्तिराम पोखरेल र कृष्ण गैरेलगायतले सञ्जालको योगदानबारे चर्चा गर्नुभएको थियो ।

कार्यक्रममा विभिन्न संघसंस्थाका प्रतिनिधि, अभिभावक, सञ्चारकर्मी तथा सञ्जालका सदस्यहरुको उल्लेख्य उपस्थिति रहेको थियो।कार्यक्रम संस्थाका अध्यक्ष दिवाकर काफ्ले, महासचिव सुचना पाण्डे र सचिव कमल चापागाईको समन्वयमा सम्पन्न भएको थियो।

रुपन्देही सामाजिक सञ्जाल रुपन्देही जिल्ला घर भई हाल विभिन्न पेशा–व्यवसाय तथा अध्ययनका सिलसिलामा अस्ट्रेलियामा रहेका नेपालीहरुको साझा संस्थाको रुपमा सन् २०१५ मा स्थापना भएको सामाजिक संस्था हो ।