बुटवल । पाल्पाको तिनाउ गाउँपालिकाले भूमिहिन दलीत, सुकुम्बासी तथा अव्यवस्थित घर–परिवारलाई जग्गाधनी पूर्जा वितरणको प्रक्रियालाई तिब्रता दिएको छ । यसैबीच गाउँपालिकाले वडा नम्बर १ देखि अव्यवस्थित बसोबासीलाई निस्सा वितरण सुरु गरेको छ ।
लामो समयदेखि जोतभोग गर्दै आएका जग्गाको पूर्जा वितरणको प्रक्रिया अन्तरगत निस्सा वितरण सुरु गरिएको गाउँपालिका अध्यक्ष प्रेम श्रेष्ठले जानकारी दिए । गाउँपालिकाले यसअघि नै भूमिहिन दलित तथा सुकुम्बासीहरुलाई निस्सा वितरण गर्ने काम सम्पन्न गरिसकेको छ । यसैगरी छुटफुट भएका घर परिवारहरुलाई आवश्यक काजजातसहित निवेदन दर्ताका लागि ३५ दिने सूचना निकालेर संकलन गर्ने काम भइरहेको अध्यक्ष श्रेष्ठले जानकारी दिए ।
गाउँपालिका उल्लेख गरिएको विवरण अनुसार १ हजार ४ सय घर परिवारले भूमिहिन दलित, सुकुम्बासी तथा अव्यवस्थित बसोबासको रुपमा निवेदन दर्ता गराएको छन् । नेपाल सरकारको नियम अनुसार प्रक्रियामा आएका निवेदनलाई सम्बोधन गरिने गाउँपालिका अध्यक्ष श्रेष्ठले बताए । नेपाल भित्र परिवारका कुनै पनि सदस्यका नाममा जग्गा जमिन, नगद तथा जग्गा बाहेक अचल सम्पत्ति भए पनि सो प्रकृयामा सामाबेश नहुने उनले स्पष्ट पारे ।
तिनाउ गाउँपालिका उपाध्यक्ष लालाबहादुर थापाले नेपाल सरकारको कानुन भन्दा फरक मापदण्ड जान नसकिने बताउँदै आवश्यक कागजातहरु निवेदनमा पेस गर्न आग्रह गरे । पालिकामा निस्सा वितरण एउटा खुट्किलो मात्र भएको बताउँदै उनले बाँकी प्रक्रियामा आवश्यक कागजात पेश गर्ने लाई पूर्जा वितरण गर्न सकिने बताए । सरकारले बनाएको मापदण्ड सबैले अनुसरण गर्न समेत उनले सुझाए ।
तिनाउ गाउँपालिकामा हालसम्म २८ जना भूमिहिन दलीत रहेका छन् भने भूमिहिन सुकुम्बासीको संख्या १७६ र अव्यवस्थित बसोबासीको सङ्ख्या १ हजार ४ सय रहेको तिनाउ गाउँपालिकाका प्रमुख प्रशासकीय अधिकृत दिनेश सारुले बताए । सारुले प्रशासनिक कामहरुमा समस्या भएमा पालिका तथा सम्बन्धित वडा कार्यालयमा सम्पर्क गर्न अनुरोध गरेका छन् ।
