लुम्बिनी प्रदेशसभामा तीन सदस्य रहेको लोसपामा पाण्डे चौथोपटक मन्त्री बन्दै छन् । यसअघि २०७८ मा एमालेका शंकर पोखरेल र २०७९ मा माओवादीका कुलप्रसाद केसी नेतृत्वको सरकारमा भौतिक पूर्वाधार मन्त्री र २०८० मा कांग्रेसका डिल्लीबहादुर चौधरी नेतृत्वको सरकारमा आन्तरिक मामिला तथा कानुनमन्त्री बनेका थिए । अहिले खेलकुद मन्त्री बन्दै छन् ।

तीन सदस्य रहेको लोसपाबाट एकै व्यक्ति पटकपटक मन्त्री बन्ने र अन्यले अवसर नपाउँने भन्दै पार्टीभित्र असन्तुष्टि बढेको हो । पाण्डे मन्त्री नियुक्त भएपछि सामाजिक सञ्जालमार्फत नेता कार्यकर्ताले असन्तुष्टि व्यक्त गरिरहेका छन् ।

प्रतिपक्षमा बसेको पार्टी संसदीय दलको बैठक पनि नबसेको र पार्टीमा छलफल पनि नगरी फेरि सरकारमा गएकामा लोसपा संसदीय दलका उपनेता कन्हैया बानियाँले विरोध जनाएका छन् । उनले पार्टीमा अवसरवाद र व्यक्तिगत प्रवृत्ति हाबी भएको गुनासो गरेका छन् । ‘संसदीय दलको बैठक पनि बसेको छैन, सरकारलाई समर्थन गर्ने निर्णय पनि कतै भएको छैन,’ उनले भने, ‘लोसपाबाट मन्त्री नियुक्त भएको खबर मिडियामा आएपछि जानकारी हुन्छ । अब पार्टीबाटै यसको विरोध सुरु गर्दै छौं ।’