बुटवल । आगामी असोज २९ गते देखि स्याङजाको गल्याङ–१ मालुंगा र पाल्पाको रम्भा–१ उत्तरबाहिनीमा उत्तरगण्डकी महामेला, दामोदर–धर्मोत्सव ०८२ हुने भएको छ ।
श्री कालीगण्डकी ज्ञान विज्ञान प्रतिष्ठानको आयोजनामा कार्तिक १९ गते सम्म धर्मोत्सवमा पांच अर्ब तुलसीदल, गाईको दुध र गण्डकी जलद्वारा सवालाख शालग्राम भवनको अभिषेक पुजन, धनधान्यचल महायज्ञ तथा लक्ष्यवती, चारबेद, अठार पुराण पाठ पारायण लगाएका कार्यक्रमहरु हुनेछ ।
प्रतिष्ठानका अध्यक्ष आचार्य चैतन्य कृष्णले यस धर्मोत्सवले लुम्बिनी र गण्डकी प्रदेशमा धार्मिक पर्यटनको सम्भावनालाई उजागर गर्ने बताए ।
रुपन्देहीको तिलोत्तमामा आयोजित तयारी भेलालाई सम्बोधन गर्दै उनले धर्मोत्सवमा दामोदर कथा, दिपदान तथा श्रङागरिक आरती, आशीर्बचन, हरिनाम संकीर्तन एवं माता पिता पुजन लगाएतका कार्यक्रमहरु गरिने बताए ।
धर्मोत्सवको अवधारणा प्रस्तुत गर्दै ज्योतिष जनार्दन न्यौपानेले धर्मोत्सवले स्थानिय कृषि उत्पादनको बजारिकणमा टेवा पुराउंदै घरेलु तथा साना उद्योगहरुको पनि बजारिकण हुने बताए । राजगारी प्रबद्र्धनको आधार तय हुनुको साथै महिलाहरुको रोजगारीमा बृद्धि पनि यस उत्तरगण्डकी महामेलाले हुने अपेक्षा लिएको उनंको भनाई छ ।
साथै उनले उत्तर गण्डकी क्षेत्रको प्रस्तावित गुरुयोजना अनुसार १ हजार व्यक्तिलाई आवास सुविधा हुने गरी धर्मशाला निमांण गर्ने, घाट व्यवस्थापन गर्ने १ हजार क्षमताको शभाहल निर्माण, पाठशाला, यज्ञशाला, गौशाला निर्माण गर्ने योजना रहेको बताए ।
त्यस्तै मुक्तिनाथ धामका स्वामि लोकानन्दले धर्मोत्सवले नेपालको धार्मिक पर्यटनको विकासमा नयां ईट्टा थप्ने बताए । कार्यक्रमका संयोजक रामप्रसाद बस्यालले सवैको सहयोगले मात्र धर्मोत्सव सफल हुनेभन्दै सवै जना महामेलामा सहभागि हुन अपिल गरे ।
