नेशनल प्याब्सन रुपन्देहीका अध्यक्ष तिलव केसीको अध्यक्षतामा भएको कार्यक्रमको उद्घाटन गर्दै शिक्षा विकास तथा समन्वय इकाई रुपन्देहीका प्रमुख माधव बन्जाडेले शैक्षिक क्षेत्रमा विद्यार्थीले ल्याएको उत्कृष्ट नतिजाले बिद्यार्थीको शैक्षिक प्रगतिको मापन गर्ने बताए।

उनले माध्यमिक शिक्षा परीक्षामा ल्याएको शैक्षिक उपलब्धिलाई माध्यमिक तहसम्म पुर्याउनकालागि विद्यार्थीलाई अझै मेहनत र लगनशिल बन्नु पर्ने उल्लेख गर्दै लगन, महनत र परिश्रमका साथमा अध्ययन गरे विद्यार्थीले थप सफलता प्राप्त गर्ने विचार राखे ।

कार्यक्रममा नेशनल प्याब्सनका केन्द्रीय उपमहासचिव कृष्णप्रसाद पौडेलले विभिन्न समयमा आयोजना हुने बधाई तथा शुभकामनालगायतका कार्यक्रमले विद्यार्थीहरुलाई शैक्षिक सफलताका लागि थप हौसला र प्रेरणा प्राप्त हुने बताए ।

उनले शैक्षिक क्षेत्रमा उत्कृष्टता हासिल गर्नकालागि विद्यार्थीको आचरण र ब्यवहारले महत्व राख्ने उल्लेख गर्दै विद्यार्थीले आफुलाई सधैव लक्ष्य केन्द्रीत भएर अध्ययनमा जोड दिनु पर्ने बताए।

नेशनल प्याब्सनका सचिव विनोद थापा मगरको संचालनमा भएको कार्यक्रममा नेशनल प्याब्सनका केन्द्रीय सदस्य जेवी क्षेत्री, सल्लाहकार प्रकाश भट्टराई, उपाध्यक्ष राजेन्द्र पराजुलीलगायतले एसईईमा सफल विद्यार्थीहरुलाई बधाई दिदै माथिल्ला कक्षामा पनि थप उत्कृष्टताकालागि शुभकामना दिएका थिए ।

सो अवसरमा उत्कृष्टतासँगै एसईईमा सत् प्रतिशत नतिजा हासिल गर्ने विषयगत शिक्षक तथा विद्यालयहरुलाई समेत सम्मान गरिएको सचिव विनोद थापा मगरले जानकारी दिए ।