गत शुक्रबार दाङबाट बुटवल आउँदै गर्दा रेसुङ्गा नगरपालिकाका नगरप्रमुख खिलध्वज पन्थी सवार गाडीको ठक्करबाट घाईते भएका युवालाई थप उपचारका लागि काठमाडौं लगिएको छ ।
बुटवल तामनगरमा मुसिकोट नगरपालिका–१ का रन्जित खत्री सवार मोटरसाइकल लाई नगरप्रमुख पन्थीको गाडीले ठक्कर दिदा दिएको थियो । मोटरसाईकललाई ठक्कर दिएपछि भाग्न थालेका नगरप्रमुख पन्थीलाई स्थानियले हपारेका थिए ।
दुर्घटनामा गम्भीर घाइते भएका खत्रीलाई सुरुमा जीतगढिमा रहेको एडमण्ड सिटी अस्पतालमा उपचारका लागि लगिएको थियो । तर त्यहाँ उपचार सम्भव नभएपछि हेलिकप्टरमार्फत काठमाडौं पठाइएको छ।
दुर्घटनापछि मेयर पन्थी भाग्न आटेका थिए । स्थानियले उनी सहित अन्य कांग्रेस नेताहरुलाई हपारेपछि पछि मेयर पन्थी अस्पतालमा खत्रीलाई भेट्न पुगेका थिए ।
परिबारका अनुसार खत्रीलाई काठमाडौंस्थित टिचिङ अस्पतालमा थप उपचारका लागि लगिएको हो ।
रेसुङ्गा नगरपालिकाका प्रमुख पन्थीले दुर्घटनामा नैतिकता नदेखाएको भन्दै चौतर्फि आलोचना हुँदै गएको छ ।
