रुपन्देहीमा एक महिला जलेको अवस्थामा मृत फेला परेकी छन् । जिल्लाको समरीमाई गाउँपालिका वडा नम्बर ५, थुम्हावा पाण्डे डीहगाउँ नजिकै आइतबार बिहानपख स्थानीय २२ वर्षीया सिर्जना पाल जलेको अवस्थामा मृत फेला परेकी हुन् ।
जिल्ला प्रहरी कार्यालय रुपन्देहीका प्रहरी नायव उपरीक्षक गणेश सापकोटाले राति पौने दुई बजे महिला चिच्याइरहेको आवाज सुनेपछि स्थानीयले प्रहरीलाई खबर गरेको र घटनास्थलमा प्रहरी पुग्दा महिला मृत भेटिएको जनाए । ‘राति १ः४० बजे खेतमा महिला चिच्याएको र खेतमा आगोको मुस्लो देखेपछि स्थानीयले प्रहरीलाई खबर गरेका थिए । मुस्लोमा पालको शव जलेको अवस्थामा मृत भेटिएको हो’, सापकोटाले भने, ‘घटनाबारे प्रहरी अनुसन्धान गरिरहेको छ ।
डीएसपी सापकोटाका अनुसार सिर्जना आफ्नो घरदेखि करिब १ किलोमिटरको दुरीमा जलेको अवस्था भेटिएकी थिइन् । सिर्जना मृत भेटिएको स्थान दानव नदी छेउमा पर्छ । प्रहरीले घटनापछि सिर्जनाका श्रीमान् र परिवारका सदस्यसहित स्थानीयलाई सोधपुछ गरिरहेको छ ।
सापकोटाका अनुसार सिर्जनाका श्रीमान् प्रमोद पाल र घररिवारका सदस्यमाथि सोधपुछ भइरहेको छ । यस्तै, उनका माइती पक्षलाई पनि बोलाएर सोध भइरहेको छ । ‘घटनाबारे प्रहरीले सुक्ष्म अनुसन्धान गरिरहेको छ’, उनले भने, ‘अहिले अनुसन्धानकै क्रममा रहेकाले हत्या वा आत्हत्या भन्न सकिँदैन ।’
