आजकै दिन देवाधिदेव महादेव र हिमालय पुत्री पार्वतीबिच विवाह भएकाले आजको दिन बिशेष रूपमा लिइने गरिन्छ । राजा भगीरथको तपस्याबाट गंगाजी यही अक्षय तृतीयाका दिन पृथ्वीमा झरेकी थिइन भने यसै दिन रेणुकाका गर्भबाट परशुराम जन्मेका थिए ।

यसै उल्लास र उत्सर्गका साथ आज वैशाख शुक्ल तृतीयाका दिन नेपाल, भारत लगायतका हिन्दु धर्मालम्बीहरूले जौको सातु खाएर वा दान दक्षिणा दिएर यो पर्ब मनाएका छन् । अक्षय तृतीयामा मुख्यत सातु खाने चलन रहि आएको छ । यस दिनमा जुन गहुंलगायतवाट बनेका सातु खाने चलन छ । यसले शितलतासमेत दिने भएकाले हिन्दु धर्ममा जुनलाई पवित्र मानिन्छ ।

बढ्दो गर्मीलाइ शीतलता प्रदान गर्न जौ, मकै, गहुं आदिजस्ता अन्नहरू बेग्ला बेग्लै भुटेर, पिसेर तयार गरिएको पीठोको सातु खाने चलन छ । आज माटो, तामा वा पित्तलको घडामा सर्वत राखेर ब्राह्मणलाई दान गरिन्छ । यस्तो घडामा ब्रह्मा, विष्णु र शिव तीनै स्वरुपका भगवानको निवास हुने मान्यता छ । यसैबीच बुटवलका समाजसेवी तिलप्रसाद भट्टराई, गिरीसरा भट्टराई र लोकनाथ भट्टराईको विशेष सहयोगमा अक्षय तृतिया विशेष कार्यक्रम गरिएको छ ।

बुटवलको रामनगर स्थित गौतमबुद्ध सामुदायिक मुटु अस्पताल नजिकै विरामीका आफन्त, स्थानिय, विद्यार्थीहरुलाई सातु, मही, जुस खुवाएर विशेष कार्यक्रम गरिएको थियो । रोटरी क्लव अफ सेन्ट्रल बुटवलमा समेत आबद्ध रहेका तिलप्रसाद भट्टराईले वैशाखको गर्मीमा सक्खरको सर्वत र जौको सातुले मानव स्वास्थ्यलाई फाइदा गर्ने भएकाले अक्षय तृतिय पर्वको महत्व रहेको भन्दै आफुहरुले विशेष कार्यक्रमको आयोजना गरेको बताए ।

त्यस्तै बुटवलका चोक चोकमा पनि विभिन्न संघसंस्था, समुहहरुले पनि सडकमा हिडडुल गर्नेहरुलाई सर्वत र सातु वितरण गरेका थिए । बुटवल योगिकुटीको देवस्थल मन्दिर समितिले पनि मन्दिर परिसरमै सर्वत र सातु वितरण गरेको थियो । अक्षय तृतीयाको दिन भगवान विष्णु र देवी लक्ष्मीले खरिद गरेको सुन र लगानीले स्वयम रक्षा र वृद्धि गर्ने जनविश्वास रहेको छ । यस दिन गरेको शुभकर्म र दानले पुण्य अक्षय पुण्य प्राप्त हुने विश्वास छ ।