दुई वर्षअघि तत्कालीन प्रधानमन्त्री शेरबहादुर देउवाले विमानस्थल उद्घाटन गरेका थिए । उद्घाटन लगत्तै कुवेतको जजिरा एयरलाइन्सले केही महिना उडान भरेको थियो । तर, नियमित उडानका लागि आवश्यक सरकारी तयारी नपुग्दा जजिराले उडान रोकेको थियो । त्यसपछि लामो समय उडान नहुँदा सरोकारवालाबीच निराशा छ ।

लामो समयपछि रुपन्देही बासिन्दाका लागि धेरै कम्पनीले एकपटक उडान थाल्ने खबरले खुसी छाएको हो । यसपाली भाइटीकाको दिनदेखि थाई एयरले उडान सुरुवात गरेको हो । उक्त कम्पनीले साताको दुई दिन भैरहवास्थित गौतमबुुद्ध विमानस्थलबाट उडान गर्ने जानकारी दिएको छ ।

कार्तिक २४ गतेबाट जजिरा एयरलाइन्स र फ्लाई दुबईले साताभरि उडान गर्ने गौतम बुद्ध विमानस्थलका सूचना अधिकारी विनोद रावतले बताए । कार्तिक २४ गतेदेखि भैरहवामा हप्ताको सातै दिन फ्लाई दुबईले उडान गर्ने उनले जनाए । जजिराले सातामा तीन दिन उडान गर्ने छ । जजिराले भैरहवा–कुवेत उडान गर्ने छ । फ्लाई दुबईले दुबई–भैरहवा–काठमाडौँ–दुबई उडान गर्ने छ । रावतका अनुसार थाई एसियाले सोमबार र बिहीबार भैरहवा–बैंकक उडान गर्ने छ ।

भैरहवामा अन्तर्राष्ट्रिय विमानस्थल निर्माणसँगै यहाँ होटल, ट्राभल एजेन्सी लगायत विभिन्न क्षेत्रमा लगानी वृद्धि भएको छ । विमानस्थलमा अन्तर्राष्ट्रिय उडान नियमित सञ्चालनमा गर्न स्थानीय विभिन्न संघसंस्थाले धर्नादेखि प्रधानमन्त्रीलाई ज्ञापनपत्र समेत बुझाएका थिए ।

तीनवटा विमान कम्पनीले नियमित उडान भर्ने भएपछि लुम्बिनीमा आशाको सञ्चार छाएको नेपाल एसोशिएसन अफ टुर एन्ड ट्राभल एजेन्ट्स (नाट्टा)का लुम्बिनी प्रदेश पूर्वअध्यक्ष सागर अधिकारीले बताए । उनले तीन वायुसेवा कम्पनीले नियमित उडान गर्नु खुसीको कुरा भएको बताउँदै यसलाई निरन्तरता दिँदै थप विमान कम्पनीलाई आकर्षित गर्न सबैले भूमिका निर्वाह गर्नुपर्नेमा जोड दिए ।

लुम्बिनी, कर्णाली र सुदूरपश्चिमका नागरिकहरूलाई काठमाडौँबाट विदेश जानुभन्दा भैरहवाबाट जाँदा सहज र सस्तो पर्ने गरी व्यावसायिक वातावरण बनाउने दायित्व निजी क्षेत्रको पनि रहेको उनको भनाइ छ । अधिकारीले भने, ‘हवाई कम्पनीले यात्रु पाएमा निरन्तरता दिन्छन् तर यात्रुहरू भैरहवा आउने वातावरण हामी सबैले सिर्जना गर्नुपर्छ ।’