बुटवल । आगामी कार्तिक २४ गतेदेखि यूएईको राष्ट्रिय ध्वजावाहाक फलाई दुबईले भैरहवाको गौतमबुद्ध अन्तर्राष्ट्रिय विमानस्थलमा उडान गर्ने भएको छ ।
हप्ताको सातै दिन फलाई दुबईले दुबई भैरहवा र भैरहवा, काठमाडौं हुंदै दुबई उडान गर्न लागेको हो । नेपाल नागरिक उड्डयन प्राधिकरणका अनुसार कार्तिकदेखि फलाई दुबई भैरहवा उडान भर्न तयार भएको हो ।
फलाई दुबईको जहाज दिउसो एक बजेर ४५ मिनेटमा भैरहवा अवतरण गर्नेछ भने भैरहवाबाट पौने ३ बजे काठमाडौं प्रस्थान गर्ने छ ।
काठमाडौंबाट भने साढे ४ बजे दुबई उड्ने छ । यो उडानले गौतमबुद्ध अन्तर्राष्ट्रिय विमानस्थलका लागि एकतर्फी उडान भएपनि भैरहवाबाट दुबई जानेलाई सहज हुने आशा गरिएको छ ।
भैरहवाबाट दुबई जान चाहनेले काठमाडौंमा एक घण्टा ट्रान्जिटमा बस्नु पर्नेछ । कुवेतको जजिरा एयरवेजले पनि भैरहवाबाट पुनः उडान गर्ने भएको छ । जजिराले कार्तिक १२ गते अर्थात् अक्टोवर २८ बाट कुवेत भैरहवा कुवेत उडान गर्न लागेको हो ।
विमानस्थलबाट उडानका लागि जजिराले नागरिक उड्डयन प्राधिकरणसंग अनुमति मागिसकेको छ ।
हप्तामा ३ दिन जजिराको जहाज बिहान ६ बजेर २५ मिनेटमा भैरहवा आएर ७ बजेर १० मिनेटमा कुवेत उड्ने छ । दुई वर्ष अघि २०७९ जेठ २ गते गौतमबुद्ध अन्तर्राष्ट्रिय विमानस्थलको उद्घाटन भएसंगै जजिराले भैरहवामा उडान थालेको थियो ।
यसैबीच नेपाल वायुसेवा निगमले यहि असोज २४ गते फूलपातीका दिन काठमाडौंबाट भैरहवा न्यारोबडी जहाज उडान गर्ने भएको छ ।
संस्कृति पर्यटन तथा नागरिक उड्डयन मन्त्रालयको प्रस्तावमा निगमले यो उडान गर्न लागेको हो ।
२४ गते बिहान ११ बजे काठमाडौं बाट भैरहवा र साढे १२ बजे भैरहवाबाट काठमाडौं उडान गर्ने जनाएको छ । काठमाडौंबाट भैरहवाको लागि ७ हजार र भैरहवाबाट काठमाडौंको लागि ३ हजार ८९० रुपैयां भाडा तय गरिएको छ ।
