लुम्बिनी प्रदेश सरकारलाई पूर्णता दिन ढिलाइ भएको छ । मुख्यमन्त्री कार्यालय बाहेक १२ मन्त्रालय रहेको प्रदेशमा अहिलेसम्म मुख्यमन्त्रीसहित ९ जना मन्त्री छन ।
तीन मन्त्रालयको जिम्मेवारी मुख्यमन्त्री चेतनारायण आचार्य आफैँले सम्हालेका छन । मुख्यमन्त्री आचार्यको जिम्मेवारीमा आन्तरिक मामिला तथा कानुन मन्त्रालय, सामाजिक विकास मन्त्रालय, महिला, बालबालिका तथा ज्येष्ठ नागरिक मन्त्रालय छ ।
नेपाली कांग्रेस र नेकपा एमालेको गठबन्धन सरकारले केही साना दललाई पनि समेट्ने योजना बनाएको छ ।
वर्तमान सरकारमा सामेल हुन जसपा, लोसपा नेपाल र नागरिक उन्मुक्ति र जनमत पार्र्टी इच्छुक छन । यद्यपि, सरकार विस्तारका सन्दर्भमा खासै छलफल भएको छैन ।
लुम्बिनी प्रदेशका मुख्यमन्त्री आचार्यले साउन ९ गते नेपाली कांग्रेसबाट ४ र एमालेबाट ४ जना मन्त्री नियुक्त गरेका थिए । उनंले साना दलहरूलाई पनि सरकारमा सहभागी बनाउने योजना अनुसार केही मन्त्रालय आफैंले समालेका छन् ।
लोसपा नेपालका लुम्बिनी प्रदेश सभाकी प्रमुख सचेतक हेमा बेल्वासेले सरकारमा जाने निर्णय भए पनि मन्त्रालयबारे टुंगो नलागेको बताए ।
नागरिक उन्मुक्ति पार्टी संसदीय दलका नेता धर्म बहादुर चौधरीले सरकारमा सामेल हुने विषयमा सामान्य छलफल भएको बताए ।
नेपाली कांग्रेस लुम्बिनी प्रदेश संसदीय दलका नेता डिल्लीबहादुर चौधरीले आफ्नो पार्टीको कोटामा परेको थप एक जना मन्त्री टुंगाउन कुनै समस्या नभएको दाबी गर्नुभयो । सरकारका प्रवक्ता दिनेश पन्थीले सरकारमा लैजाने विषयमा ४ वटा साना दलसंग छलफल भए पनि अझै कुन मन्त्रालय कसलाई दिने भन्ने नटुगिएको बताए ।
