नेपाल प्रहरीका महानिरीक्षक बसन्तबहादुर कुँवरले प्रहरीको आन्तरिक संगठन सुदृढिकरणलाई प्राथमिकता दिएको बताएका छन् । उनले यस क्रममा सबै प्रहरीको खाता जाँच सुरुवात गरिएको जनाए । संगठनको आन्तरिक सुदृढिकरण बिना नागरिकको भरोसा जित्न सम्भव नभएकाले प्रहरी जवानदेखि शिर्ष नेतृत्वको खाता जाँच थालिएको उनले बताए । बुधबार जिल्ला प्रहरी कार्यालय, रुपन्देहीको नवनिर्मित भवन उद्घाटन गर्दै उनले मुलुकभरका प्रहरी युनिटका सूचना महानिरीक्षकसम्म पुग्ने व्यवस्था गरिएको भन्दै कर्तव्यनिष्ठ भएकार काम गर्न प्रहरी कर्मचारी निर्देशन दिए । प्रहरीको काम बोल्ने भन्दा व्यवहारमा गरेर देखाउने भएकाले व्यवसायिक निष्ठा कायम राख्ने कुरामा ध्यान दिन कुँवरले निर्देशन दिए । प्रहरीप्रति उठेका गुनासाको सम्बोधन गरिने उल्लेख गर्दै उनले स्थानीय तहसित सहकार्य गरेर काम गर्न मातहत निकायलाई निर्देशन दिए ।
रुपन्देहीको बेलहिया नाकामा पर्यटक लक्षित एकीकृत जाँच चौकी स्थापना गरेर नमुना काम भएको उल्लेख गर्दै उनले अब प्रहरीले उक्त चौकीको उद्देश्य अनुसार सेवा प्रदान गर्ने कुरामा ध्यान दिनुपर्ने जनाए । भारतबाट भित्रिने पर्यटक लक्षित एकिकृत चौकी भएकाले गुनासो रहित तरिकाले काम गर्न निर्देशन दिए । रुपन्देहीको पर्यटकीय जिल्लाका साथै बेलहिया स्थलमार्गबाट पर्यटक भित्रिने प्रमुख नाका भएको जनाउँदै यहाँ प्रस्तुत हुने व्यवहार विश्वभरि पुग्ने भएकाले काम गर्दा ध्यान दिनु उनले आग्रह गरे ।
प्रहरीले पीडितलाई न्याय दिने कुरामा ध्यानु दिनुपर्नेमा उनको जोड थियो । सिद्धार्थनगर नगरपालिका प्रमुख इश्तियाक अहमद खाँले सहकार्यले राम्रो काम गर्न सकिने बताए । रुपन्देहीका प्रमुख जिल्ला अधिकारी गणेश अर्यालले लामो समयदेखि जिल्ला प्रहरीको चुहिने, डुवानमा पर्ने र सांघुरो कार्यालय भवन रहेको उल्लेख गर्दै अब सहजरुपमा सेवा प्रवाह हुने बताए । लुम्बिनी प्रदेश प्रहरी प्रमुख प्रहरी नायव महानिरीक्षक (डीआइजी) कुवेर कडायतले नयाँ र सुविधा सम्पन्न संरचनाले प्रहरीलाई उच्च मनोबलसाथ काम गर्न सघाउने बताए । रुपन्देही प्रहरी उपरीक्षक रन्जितसिंह राठौंरले ५९ वर्षपछि रुपन्देही प्रहरीले सुरक्षा मापदण्डसहितको नयाँ भवन लगायत पूर्वाधार प्राप्त गरेको जनाए । यसअवधिमा पुरानो र जिर्ण भवनबाट पनि बिचलित नभई सेवा प्रदान गरिरहेको उनको भनाई छ । नेपाल प्रहरी प्रदेश कार्यालयका इन्जिनियर डीएसपी रोशन सारुमगरले सुविधासम्पन्न २२ कोठासहितको कार्यालय परिसरभित्र कार्यालय प्रमुख निवास, सिनियर प्रहरी अधिकृत निवास, जुनीयर प्रहरी अधिकृत, हवाल्दार र जवान ब्यारेक, सुविधा सम्पन्न मेस, स्नान गृह र शौचालय रहेको जनाए ।
प्रहरीको भवन निर्माणका लागि २०७६ माघ १७ गते निर्माण कम्पनीसित सम्झौंता गरिएको थियो । भने, २०८१ साउन ३१ गते भवन लगायत संरचनाको निर्माण पूरा भएको थियो । सिद्धार्थनगर–१२, मा नेपाल प्रहरीको नियमित बजेट अन्तर्गत १४ करोड ९६ लाख १४ हजार ५ रुपैयाँ लगानीमा निर्माण पूरा भएको कार्यालय भवनसहितका पूर्वाधारको उ्दघाटन गरिएको हो । सुरक्षा मापदण्ड सहितको कार्यालय भवन र आवश्यक पूर्वाधार निर्माण भएपछि नियमित कायममा थप सहजता हुने जनाइएको छ ।
