वडा कार्यालय बाट स्वीकृत लिएर मेला आज देखि सुरु गर्न लागिएकोमा रुपन्देही व्यापार संघको निर्देशनमा ‘गुण्डागर्दी’को शैलिमा मेला स्थलमा तोडफोड तथा हातपात गरिएको मेला सञ्चालक प्रकाश भुसालले बताए ।

नेपाली लुगा घरको आयोजनामा दशैसम्म मेला लाग्ने बताइएको मेलामा नेपाली उत्पादनका जुत्ता तथा चप्पलहरु राख्ने भनिएको छ ।

युवाहरुको समुहले भने बुटवलको बजार शिथिल भएको अवस्थामा कुनै पनि व्यक्तिले लामो समय सम्म मेला लगाउँदा व्यापारीहरुको उठिबास हुने बताएका छन् ।

‘हामीले लाखौ भाडा तिरेर व्यवसाय गरेका छौ । तर यहाँ खुल्ला स्थान छ भन्दैमा लामो समय सम्म मेला त्यो पनि व्यक्तिले लगाउँदा बुटवलका व्यवसायी उठ्नुको विकल्प छैन् । त्यसैले यो मेला राकिनुपर्छ’ एक युवाले भने ।

जुत्ता मेला रोक्न यहाँका केही संघसंस्थाले सञ्चालकलाई निर्देशन पनि दिएका थिए ।

उता रुपन्देही व्यपार संघले यसअघि नै उक्त मेला रोक्नका लागि बुटवल उपमहानगरपालिका वडा नम्बर ८ लाई ध्यानाकर्षण पत्र पठाएको थियो ।

मेला स्थलमा तोडफोडको विषयमा संघका अध्यक्ष दिपक अधिकारीले भने आफूलाई कुनै जानकारी नभएको दाबी गरेका छन् । यद्यपी उक्त मेलाबाट स्थानीय व्यवसायी मर्कामा पर्ने भएकाले संघले मेला रोक्न ध्यानाकर्षण गराएको उल्लेख गरे ।

यस्तो छ व्यापार संघको ध्यानाकर्षण पत्र 

नेपालका ८ उद्योगका ३० भन्दा धेरै ब्राण्डका तीन हजार डिजाइनका जुत्ता राखिने बताइएको मेलामा ग्राहकको सुविधाका लागि १५ देखि ५० प्रतिशत छुटको ब्यवस्था गरिएको मेला आयोजकले बताएका थिए । दशैसम्म संचालन हुने मेलामा ३५ हजार जोड जुत्ता चप्पल विक्रि वितरण हुने र करिव पाँच करोड बरावर लक्ष्यसहित मेला आयोजना गरिएको थियो ।

व्यापार संघले मेला सञ्चालनका विषयमा ध्यानआर्कषण पत्र पठाएपछि भने व्यापार संघले व्यापारमा ‘सिन्डिकेट’ लगाउन खोजेको आरोप लगाउँदै सामाजिक सञ्जालमा टिका टिप्पणी भइरहेको छ ।