सडक डिभिजन पाल्पाले सिद्धार्थ राजमार्ग अन्तर्गत तिनाउ गाउँपालिका-३, दोभान क्षेत्रमा असार अन्तिम साता झरीका बीच गरिएको कालोपत्र उप्काउन लगाएको छ ।
निर्माण व्यवसायी जीवन एण्ड ब्रदर्शलाई पत्र लेखेर कार्यालयले सिद्धार्थ राजमार्गको दोभानमा निर्माण गरेको कालोपत्र न्यून गुणस्तरको भएकाले सबै उप्काएर सुरक्षित स्थानमा फाल्न निर्देशन दिएको हो ।
सडक डिभिजनले अन्यथा कार्यालयले नै उप्काउन बाध्य हुने चेतावनी दिएपछि निर्माण कम्पनीले गुणस्तरहीन कालोपत्र उप्काएको छ । कार्यालयले उपयुक्त मौसम र तापक्रमबिना अब सडक कालोपत्रे नगर्न समेत गराएको छ ।
कालोपत्र उप्किएपछि पाल्पा सांसदसँगै अन्य सरोकारवालाले पनि चासो लिँदै स्थलगत अनुगमन गरेका छन् ।
सिद्धार्थ राजमार्गको दोभान क्षेत्रमा गरिएको कालोपत्र भ्याटसमेत १८ लाख १६ हजारमा ठेक्का लागेको हो । निर्माण व्यवसायीले असार २५ देखि ३१ गतेसम्म पानी परिरहेकाबेला कालोपत्र गरेपछि स्थानीयले लापरबाही भएको गुनासो गर्दै आएका थिए ।
