दाङ । लुम्बिनी प्रदेश सरकारले स्वास्थ्यकर्मीसहितको टोली भुकम्प प्रभावित क्षेत्र जाजरकोट र रूकुममा पठाएको छ ।
जाजरकोटको रामीडाँडाँ आसपासलाई केन्द्रविन्दु बनाएर गए राति गएको भूकम्पमा प्रभावितहरूको उपचार र उद्धारका लागि लुम्बिनी सरकारले स्वास्थ्यकर्मी र औषधिसहितको टोली जाजरकोट पठाएको हो ।
लुम्बिनीका मुख्यमन्त्री डिल्लीबहादुर चौधरीको निर्देशनमा लुम्बिनीवाट चिकित्सक र औषधिसहितको टोली जाजरकोट प्रस्थान गरिसकेकाे मुख्यमन्त्रीका प्रेस सल्लाहकार गोपालप्रसाद शर्माले बताए ।
कर्णालीका मुख्यमन्त्री राजकुमार शर्माले तत्काल स्वास्थ्यकर्मीको बढी आवश्यक परेको भन्दै सहयोगका लागि आग्रह गरे पछि सो टोली जाजरकोट पठाइएको हो । जसअनुसार राप्ती प्रादेशिक अस्पताल तुलसीपुर दाङका मेडिकल सुपरिटेडेन्ट डा. पदमराज अधिकारीको नेतृत्वमा २० जना स्वास्थ्यकर्मी र औषधीसहितको टोली जाजरकोट र रुकुमका लागि प्रस्थान गरेका छन् ।
सो टोलीमा सरकारका प्रतिनिधि, उद्धारका लागि आवश्यक पर्ने सुरक्षाकर्मीसहितको विशेषज्ञ टोली पनि जाजरकोट गएका छन् ।
