रुपन्देहीको धकधईमा भारतबाट आएका कालिगढले मूर्ति बनाईरहेका छन् ।

दशैंतिहारको बेला तराई क्षेत्रमा धेरै मात्रामा प्रयोग हुने दुर्गा भगवतीका मूर्तिहरु पहिले भारतीय बजारबाट आयात हुने गरेकोमा पछिल्ला वर्षहरुमा भने कालिगढहरु आफै आएर समेत बनाउने गर्न थालेका छन् ।

यसवर्ष असोज तेस्रो सातासम्म परेको वर्षाका कारण मूर्ति बनाउन ढिलाई भएको कालिगढहरु बताउंछन् ।

माटोमा काठ र परालको भुस मोलेर बनाईने मूर्तिलाई घाममा सुकाएर रंग भरेर आकर्षक बनाउने गरिन्छ ।

दशैंको बेला घटस्थापनाको दिनदेखि कोजाग्रत पूर्णिमा सम्म दुर्गामूर्ति स्थापना गरि पूजा गर्ने गरिन्छ ।

रुपन्देहीको चिल्हियाका चन्द्रपाल केवटले १४ वर्षको उमेरदेखि नै माटोका मूर्ति बनाउन शुरु गरेका थिए । यो विचमा दुईसय भन्दा बढि दुर्गा र लक्ष्मीमाताका मूर्ति बनाईसकेको पालले बताए ।

दर्जनौं संख्यामा सिमेन्टको घोंडा, हात्ति, मयंूर, डांफे जस्ता जनावर र पंक्षी बनाईसकेका चन्द्रपाल मूर्तिकलामै भविश्य राम्रो भएको बताए ।

दशैं र तिहारमा दुर्गा र लक्ष्मीका मूर्ति बनाउने चन्द्रपाल अरु समयमा भने विभिन्न पार्क, घरका बगैंचा तथा मठमन्दिरहरुमा राख्नको लागि अर्डर गरिएका सिमेन्टका मूर्ति बनाउने गर्छन ।

मूर्ति बनाएरै दशैं तिहारमा चार/पांच लाख सम्म आम्दानी गर्ने गरेको चन्द्रपालको अनुभव छ ।