नेकपा एमालेको लुम्बिनी प्रदेश अध्यक्षका लागि हरि रिजालले पनि उम्मेदवारी दर्ता गराएका छन् ।
रुपन्देहीको बुटवलमा जारी प्रदेश अधिवेशनमा नेतृत्वका लागि रिजालले आइतबार राति उम्मेदवारी दर्ता गराएका हुन् । विजय बिराज विष्टलाई प्रस्तावक र लालसिंह काउछालाई समर्थक राखेर रिजालले उम्मेदवारी दर्ता गराएका हुन् । रिजालले वारेसमार्फत उम्मेदवारी दर्ता गराएको निर्वाचन कमिटी सदस्य भरत पोखरेलले जानकारी दिए ।
सहमतिमा नेतृत्व चयनका लागि भएका प्रयास विफल भएपछि अध्यक्षका प्रत्यासीहरुले उम्मेदवारी दर्ता गराएका हुन् । अध्यक्षका लागि राधाकृष्ण कँडेलले सुरुमै उम्मेदवारी दर्ता गराएका थिए ।
नयाँ नेतृत्व चयन गर्दै एमाले लुम्बिनी प्रदेश अधिवेशन भोलि सम्पन्न गर्ने तयारी छ । अधिवेशनको एमाले अध्यक्ष केपी शर्मा ओलीले शनिवार उद्घाटन गरेका थिए ।
