नेकपा एमालेका महासचिव शंकर पोखरेलले मुलुकको लागि धेरै दल होइन थोरै बलिया शक्तिको खाँचो रहेको बताएका छन् ।
धेरै राजनीतिक दल हुँदा मुलुकमा अस्थिरता बढेको बताउँदै उनले थोरै शक्तिको खाँचो रहेको बताए । शनिवार बुटवलमा शुरू भएको एमाले प्रदेश अधिवेशनमा बोल्दै महासचिव पोखरेलले भने, ‘जति धेरै राजनीतिक दल, त्यति धेरै वैचारिक विचलन, त्यति धेरै अस्थिरता र वैदेशिक हस्तक्षेप बढ्ने स्पष्ट छ ।’
पोखरेलले एमालेभित्र पदका लागि प्रतिस्पर्धा नभएको दाबी समेत गरे । राजनीतिक, वैचारिक र सांगठनिकरुपमा स्पष्ट नेता केपी शर्मा ओली नेतृत्वको पार्टीमा एकताबद्ध रहेको उनले स्पष्ट पारेका छन् ।
लुम्बिनी प्रदेशको अधिवेशनलाई शनिवार बुटवलमा सम्बोधन गर्दै उनले पार्टी एकताबद्ध रहेको र त्यसको जवाफ प्रतिनिधिले नेतृत्व चयनबाटै दिने उनले बताए ।
महासचिव पोखरेलले केन्द्रका केही सञ्चारमाध्यमले एमालेलाई कमजोर पार्ने कुत्सित मनसायले कुनै प्रतिस्पर्धा नै नभएको विषय उठाएर भ्रम फैलाएको पनि आरोप लगाए । ‘हामीबीच कुनै प्रतिस्पर्धा छैन,’ उनले भने, ‘प्रतिस्पर्धा छ त, केवल दलाल, पुँजीवादी र विदेशी शक्तिको गोटी बन्नेहरूसँग छ ।’ उनले मुलुकलाई बलियो शक्ति निर्माणका लागि प्रतिस्पर्धा गर्नुपर्ने बेला भएको पनि स्पष्ट पारे ।
एमाले कुनै पनि भ्रम र षडयन्त्रबाट प्रभावित नहुने, विकास र समृद्धिका लागि मुलुकको स्वाधीनता र स्वाभिमानका लागि एकताबद्ध भएर अघि बढिरहेको बताए । ‘अहिलेको जुन भ्रम र षडयन्त्र भइरहेको छ, त्यसलाई नेतृत्व चयनका बेला प्रतिनिधिहरूले नै गलत साबित गरिदिनु हुनेछ,’ उनले भने, ‘लुम्बिनीबाटै एमाले र राष्ट्रलाई बलियो बनाउने गरी नेतृत्व चयन गर्नुहुनेछ ।’
