बुटवल । नेकपा माओवादी केन्द्रका उपाध्यक्ष तथा पूर्वसभामुख कृष्णबहादुर महराले सुन तस्करसंग आफ्नो कुनैपनि सांठगांठ नभएको दाबी गरेका छन् ।
दाङको घोराहीमा मंगलबार पत्रकारहरुसंग कुरा गर्दै महराले सुन प्रकरणमा आफूविरुद्ध सञ्चारमाध्यममा गलत अफवाह फैलाइएको जिकिर गरे ।
सुन तस्करी प्रकरणमा जोडिएका चिनिया नागरिक वाङलाई आफूले फलफूल व्यापारीको रुपमा केहिवर्ष देखि चिनेको र त्यही रुपमा मात्रै कुरा गरेको महराले दावी गरे ।
वाङसंग सुनका बारेमा कहिल्यै फोनमा कुराकानी नभएको महराले बताए । महराले वाङले एकजना साथीको इलेक्ट्रोनिक चुरोट भन्सारमा रोकिएको र भन्सारबाट निकालिदिन आग्रह गर्दै आफूकहां आएको स्वीकार गरे ।
सोही आधारमा आफूले भन्सारका कर्मचारीसंग कुरा गरेको र हेरेर कानुनअनुसार काम गर्न मात्रै आग्रह गरेको उनको भनाई छ । ‘आशंका लाग्छ भने सुन तस्करी प्रकरणमा राज्यलाई सघाउन आफू तयार छु’ उनले भने ।
