बुटवल । शिक्षा विकास तथा समन्वय इकाइ रुपन्देहीले अनुमती विना विदाको दिन पनि सवारी चलाएपछि जिल्ला प्रशासन कार्यालय रुपन्देहीले स्पष्टिकरण माग गरेको छ ।
रुपन्देहीका प्रमुख जिल्ला अधिकारी भरतमणि पाण्डेले सार्वजनिक बिदाको दिन कार्यालय प्रयोजन बाहेक व्यक्तिगत प्रयोजनमा उक्त कार्यालयको गाडीको प्रयोग गरिएको भनेर उजुरी आएपछि तत्कालै गाडी नियन्त्रणमा लिइ कारवाही प्रक्रिया अगाडि बढाइएको बताए ।
जिल्ला प्रशासन कार्यालयले तीन दिन भित्रमा जवाफ दिन भन्दै उक्त कार्यालयलाई सोमबार लिखित स्पष्टिकरण माग गरेको हो ।
गत शनिवार शिक्षा विकास तथा समन्वय इकाइ रुपन्देहीका तत्कालीन इकाइ प्रमुख दीपेन्द्र ढकाल र उनका निकटका केही व्यक्ति सवार रहेको अवस्थामा बा२झ१०१० नम्बरको सरकारी गाडीलाई राजमार्ग सुरक्षा तथा ट्राफिक व्यवस्थापन कार्यालय बुटवलले बुटवल नजिक पूर्वपश्चिम राजमार्गबाट नियन्त्रणमा लिएको थियो ।
ट्राफिक डीएसपी होमबहादुर थापाले उक्त गाडी शनिवार संचालन गर्नका लागि सम्बन्धित निकायबाट अनुमती नलिइएकाले गाडी नियन्त्रणमा लिइ कारवाहीका लागि आइतबार पत्रका साथ जिल्ला प्रशासन कार्यालयमा बुझाइएको बताए । उनका अनुसार, गाडीमा दीपेन्द्र ढकाल लगायत अन्य चारजना व्यक्ति पनि थिए ।
सरकारी सवारी साधन सार्वजनिक विदाको दिन संचालन गर्नु परेमा संचालन गर्नु पर्ने प्रयोजन खुलाएर समबन्धित जिल्ला प्रशासन कार्यालयबाट पूर्व अनुमती लिनु पर्ने नियम छ ।
