यो सडक सञ्चालनमा आएपछि बुटवलको नेपालगञ्ज रोडबाट कालिकापथ जानेआउने निकास सहज हुने बुटवल उपमहानगरपालिकाका प्रमुख खेलराज पाण्डेयले बताए।

उनले ४१ फुटको सडक बनाउने गरी सो क्षेत्रमा रहेका संरचना भत्काइएको र यसले कालिकापथ जान आउन सहज हुने र मुख्य सडकको चाप कम गर्न मदत गर्ने बताए ।

उनले अस्पताल र कालिकामन्दिरको क्षेत्रमा आवश्यक पर्खाल बुटवल उपमहानगरपालिकाले लगाउने र सडक पक्की गर्ने तयारी अगाडि बढाएको बताए।

‘कालिकापथ र राजमार्गको नेपालगञ्ज रोड जोडिने भएको छ-उनले भने-यसले कालिकापथको उत्तरी निकास कहाँ हो भन्ने अन्योल हटाउने छ भने कालिकापथ र नेपालगञ्ज रोड जोडिएपछि सवारी चाप पनि कम हुनेछ।’

सो क्षेत्रमा डोजर लगाएर बुटवल उपमहानगरपालिकाले सडक सञ्चालनमा ल्याउने भएपछि स्थानीयले खुशी प्रकट गरेका छन्।

यता नेकपा एमाले क्षेत्र नम्बर २ रूपन्देहीका संयोजक बाबुराम पन्थीले हाम्रो पहल र जोडदार मागले बाटो खोलिएको बताए ।

‘यो कालिकापथको बाटोलाई निकास नभएर समस्या थियो’ पन्थीले भने, ‘हाम्रो पहललाई मानेर नगरले आज निकास खोलेको हो । यसले अब कालिकापथलाई थप गन्जार र चलाएमान गराउँछ ।’

कालिकापथ सडक निर्माणका लागि नेता पन्थीले व्यापक रुपमा पहलकदमी लिएपछि सडक मिचेर बनेका घरहरु भत्काइएका थिए ।