अलपत्र रहेको बेलबास बेथरी सडक खण्डअन्तगर्त मोतीपुर क्षेत्रको निर्माणको काम अघि बढ्ने भएको छ । बजेट अभावले झण्डै चार वर्षदेखि अलपत्र परेको बेलबास–मोतीपुर–बेथरी चार लेन सडक खण्डलाई संघबाट प्रदेशमा १८ करोड बजेट आउने भएपछि अधुरो रहेको निर्माणको काम पुन: अघि बढ्न लागेको हो ।
२१ किलोमिटरको यो सडक बेतहानीदेखि नहरपुरसम्मको ३ किलोमिटर अलपत्र हुँदा स्थानीयले लामो समयदेखि धुलो र हिलोको सास्ती खेप्दै आएका छन् ।
लुम्बिनी प्रदेशका भौतिक पूर्वाधार तथा विकास मन्त्री भूमिश्वर ढकालले निर्माणको काम अब अघि बढ्ने बताए । ‘सबै प्रक्रिया सकेर संघीय अर्थ मन्त्रालयबाट प्रदेशबाट बजेट आउँदैछ,’ उनले भने, ‘अलपत्र काम अब अघि बढ्छ । बिलम्ब भएको निर्माण शुरू हुन्छ । विष्णु पौडेल अर्थमन्त्री हुँदा बजेट विनियोजन भएको थियो । अबको केही दिनभित्र प्रदेशमा बजेट आउछ, लगतै काम अघि बढछ ।’
संघबाट बजेट प्रदेशको दायित्व भुक्तानी प्रयोजनार्थ बजेट ‘पिएलएमबिआइएस’मा प्रविष्ट भएको उनले जानकारी दिए । ‘ठेक्का लगाउनुपर्ने छैन, यसअघिको बज्रगुरु कान्छाराम जेभीले निर्माण थालेको हो, उनले नयाँ टिमलाई अख्तियारी दिएको छ,’ मन्त्री ढकालले थपे ।
कान्छाराम जेभीको ८ किलोमिटर ठेक्कामध्ये ३ किलोमिटर बाँकी छ । तीन वर्षमा सक्ने गरी पश्चिमबाट लुम्बिनी घुम्न आउने पर्यटकलाई बुटवलबाट सिधै बुद्ध जन्मस्थल जान र आउन आर्थिक वर्ष २०७२/७३ मा बेलवास–बेथरी पर्यटन मार्ग निर्माण शुरू गरिएको थियो । नमूना सडकको रूपमा निर्माण थालिएको विकास आयोजना शुरूआतमा रणनीतिक सडक अन्तर्गत २ अर्ब ८० करोड रुपैयाँको लागतमा संघीय सरकारले निर्माण अघि बढाएको थियो ।
मुलुक संघीयतामा गएपछि संघीय सरकार मातहतको सडक डिभिजन कार्यालय, बुटवलले २०७५ सालमा सडकलाई लुम्बिनी प्रदेश सरकारलाई हस्तान्तरण गरेको थियो ।
लुम्बिनी प्रदेश भौतिक पूर्वाधार तथा विकास मन्त्रालयका सूचना अधिकारी पुरुषोत्तम पौडेलले पत्राचारका सबै प्रक्रिया पूरा भएर बजेट प्रदेशमा आउने प्रक्रियामा गएको बताए ।
आयोजनाको कहिले जग्गा विवाद, कहिले बजेट अभाव त कहिले निर्माण कम्पनीले काम नगर्दा चरम ढिलाइले लागत बढेर ३ अर्ब ५० करोड पुगेको छ । तीन खण्डमा निर्माणको ठेक्का सम्झौता भएकोमा दुई खण्डको काम भए पनि एक खण्ड अझै बाँकी छ ।
सडकको बीच भागमा नहर र दुवैतर्फ सात–सात मिटरको डबल लेनको छ । सडकका दुवै किनारमा दुई मिटरको साइकल लेन र त्यसपछि १.५ मिटरको फुटपाथ छ भने, बीचमा नहरको भित्तामा हरियाली बनाउने योजना छ । बुटवलको बेलबासबाट सुरु भएको चार लेन सडक मोतिपुर, शुद्धोधन, सियारी हुँदै गौतमबुद्ध अन्तर्राष्ट्रिय विमानस्थलसम्म पुग्छ ।
बेथरी बजार भैरहवा–लुम्बिनी सडक खण्डमा पर्छ । यो सडक निर्माण हुँदा स्थानीय कृषि उपजको बजारीकरणमा सहज भएको बुटवल उपमहानगरपालिका वडा नम्बर ११ का वडा अध्यक्ष रामचन्द्र क्षेत्रीले बताए ।
यो सडक पूर्वअर्थमन्त्री विष्णु पौडेलको योजनामा अघि बढेको थियो । दुवैतिर सडक बत्ती र नहरको पानीतर्फ फर्काइएका रङ्गिन बत्तीले यो सडकलाई आकर्षक बनाउने योजना छ । नहरमा पानीको मात्रा बढाएर लामो दूरीको र्याफ्टिङ वा बोटिङसमेत गर्न सकिने महत्वकांक्षी योजना अगाडि सारिएको छ ।
