नेपाली मौलिक कला संस्कृति, स्वाद र पहिचानको सम्मान, आन्तरिक पर्यटन प्रवर्द्धन, विकास र रोजगारी सृजना हाम्रो अभियान, सडकमै खाऔं, सडकमै रमाऔं भन्ने नाराका साथ महोत्सवको आयोजना गरिएको होटल तथा रेष्टुरेन्ट व्यवसायी संघ रुपन्देहीका अध्यक्ष माधव खनालले बताए ।

उनले खाना महोत्सवले पर्यटन प्रवर्द्धन मात्र नभई नेपाली कला संस्कृति एवं खानपानका परिकारको प्रचारप्रसार र बजारीकरण हुने बताए ।

यस वर्ष महोत्सव स्थलमा फरकपन र नयाँ शैलीबाट सवारी आवागमनमा कुनै असर नपर्ने गरी स्टल निर्माण गरिएको उनले बताए । ‘बुटवलले पस्किने नयाँ खानाका स्वाद र परिकार नै महोत्सवको विशेषता हो,’ उनले भने, ‘सडकमै १ सय बढी परिकारको स्वाद लिन पाइनेछ ।’ महोत्सवमा विभिन्न प्रकृतिका ५५ वटा स्टल रहने उनले बताए ।

महोत्सवमा विभिन्न समुदायका मौलिक परिकारका स्टल राखिएका छन् । थारुका २, नेवारी ७, मगर समुदायसहितका स्टल रहने छन्। महोत्सव व्यवस्थापनका लागि करिब ३० लाख खर्च हुने आयोजकको अनुमान छ।

महोत्सवमा सुरक्षा व्यवस्थापनका लागि सिसिटिभी एवं सेक्युरिटी कम्पनीबाट सुरक्षा व्यवस्थापन मिलाइएको छ ।

तीन दिने सडक खाना महोत्सवमा साँझ ६ देखि राति ११ बजेसम्म सडकमै खानाका परिकार पाइनेछन् । संघले २०७५ देखि सडक खाना महोत्सव गर्दै आएको छ।

यस वर्षको खाना महोत्सवमा २ लाख बढी दर्शकले अवलोकन गर्ने २ करोड बढीको कारोबार हुने आयोजकको अनुमान छ ।