बुटवल । दुई दशकदेखि रुपन्देहीको भैरहवाबाट सेवा दिइरहेको लुम्बिनी नेत्रालय प्रालिले बुटवलमा शाखा विस्तार गरेको छ । बुटवलको पुष्पलाल पार्कमा नयाँ शाखा संचालनमा आएको हो ।
शाखा विस्तारको अवसरमा एक सातासम्म निशुल्क स्वास्थ्य शिविर सञ्चालन गरिएको म्यानेजिङ डाइरेक्टर हिरा श्रेष्ठले जानकारी दिए । बुटवलमा आयोजित पत्रकार सम्मेलनमा श्रेष्ठले नेत्रालयले विशिष्टकृत र आधुनिक सेवा दिनका लागि सेवा विस्तार गरिएको बताए । उनका अनुसार स्थापना पछिल्ला २० वर्षमा लाखौँ बिरामीले सेवा लिइसकेका छन् । उनले उपचारका लागि हरेक वर्ष ६०५ भारतीय नागरिक समेत नेपाल आउने गरेको तथ्यांक प्रस्तुत गरे ।
श्रेष्ठले आगामी दिनमा कपिलवस्तुको कृष्णनगर, लुम्बिनी र सुनौली गेटमा पनि शाखा विस्तार गर्ने योजना रहेको बताए । सो अवसरमा चिफ मेडिकल डाइरेक्टर डा. सन्तोष सुवेदीले नेत्रालयले अत्याधुनिक प्रविधि र मेसिन प्रयोग गरी सेवा प्रदान गर्दै आएको उल्लेख गर्दै बुटवलमा शाखा विस्तारपछि लुम्बिनी प्रदेशका नागरिकलाई अझ सहज र प्रभावकारी उपचार पाउने बताए ।
त्यसैगरी डेपुटी डाइरेक्टर अनिल शेरचनले नेत्रालयको सेवाप्रति सबैको सकारात्मक प्रतिक्रिया आएको बताउँदै अझ गुणस्तरीय सेवा प्रदान गर्ने प्रतिबद्धता जनाए ।
कार्यक्रममा नानी रोग विशेषज्ञ डा. ज्योति सापकोटाले आँखाको नानी अत्यन्त संवेदनशील र महत्वपूर्ण हुने भएकाले समयमै जाँच आवश्यक रहेको बताए ।
करिब ३ करोड लगानीमा निर्माण गरिएको बुटवल शाखामा आरओपी, रेटिना उपचार, र विशेषज्ञ चिकित्सकहरूको सेवा उपलब्ध छ । शाखामा हाल ६५ जना कर्मचारी कार्यरत छन् ।
शुभारम्भ अवसरमा जाँच शुल्कमा छुटका साथै रेटिना जाँच बिहीबार, नानी प्रत्यारोपण शुक्रबार र जलबिन्दु परीक्षण शनिबार (कार्तिक १ गते) गरिने जनाइएको छ ।
