रुरुक्षेत्रदेखि गुल्मी दरबार गाउंपालिकाको रुन्खादहसम्म २५ किलोमिटर सडक यही आउंदो फागुन २५ सम्म कालोपत्र गर्ने काम सकिने मदनभण्डारी राजमार्ग आयोजना कार्यालय गुल्मीका सूचना अधिकारी एवं इञ्जिनियर हुमनाथ पौडेलले जानकारी दिए ।

रिडीदेखि २५ किलोमिटरसम्म ढलान र अस्फाल्ट गर्ने कार्यक्रम रहेको र अहिलेसम्म आठ किलोमिटर सम्पन्न भइसकेको उनले बताए । बांकी १७ किलोमिटर काम मौसमले साथ दिए यस आर्थिक वर्षमा हुने उनको भनाई छ ।

निर्माण कम्पनीले रुरुक्षेत्र गाउंपालिका, छत्रकोट र गुल्मीदरबार क्षेत्रमा ग्रेड कटिङ र मोड सुधारको काम अन्तिम चरणमा पुगेको जनाएको छ ।

सम्झौता अनुसार कटिङ, नाली, संरचना निर्माण र ग्राभेलको काम दु्रतगतिमा भइरहेको छ । पच्चीस किमी सडकअन्तर्गत दुई किमी ढलान र छ किमी कालोपत्र भइसकेको आयोजना कार्यालयका सूचना अधिकारी हुमनाथ पौडेलले बताए । उक्त सडकखण्डमा हालसम्म ७० प्रतिशत भौतिक र ५५ प्रतिशत वित्तीय प्रगति भइसकेको छ ।

सडक निर्माणका क्रममा गत दुई वर्ष यस क्षेत्रका नागरिकले धुलो र हिलोको समस्या भोग्नुपरेको थियो । सडक निर्माणका लागि २०७९ फागुन २६ मा समानान्तर–एलाइट जेभीले रु एक अर्ब ५० करोडको लागतमा रिडी–रुन्खादह सडकको ग्रेड कटिङ, मोड सुधारसंगै कालोपत्र गर्ने सम्झौता भएको थियो ।