रुपन्देहीको तिलोत्तमा नगरपालिकाभित्र पर्ने बुटवल-भैरहवा सडकखण्ड अहिले फूलले ढकमक्क भएको छ। बसन्त ऋतु शुरू भएसँगै सडकको डिभाइडर र सर्भिस लेनमा फुलेका फूलले सम्पूर्ण क्षेत्रलाई आकर्षक बनाएको छ।
करीब १३ किलोमिटरको यो सडकखण्डमा डिभाइडरमा बुद्धका मूर्तिसँगै रोपिएका र ढकमक्क फुलेका बेगमबेली फूलहरूले सडकको सौन्दर्य अझ बढाएका छन्। सर्भिस लेनमा पनि हरिया बनस्पति र फूलहरू देख्न सकिन्छ।
तिलोत्तमा नगरपालिकाले सडक सौन्दर्य बढाउन फूल रोप्ने, संरक्षण गर्ने र नियमित रेखदेखको काम गर्दै आएको छ। नगरपालिकाका अनुसार सडकको बीच डिभाइडर र सर्भिस लेनमा हाल २५ सयभन्दा बढी बेगमबेली फूल रोपिएका छन्।
नगरपालिकाले बेगमबेली फूललाई ‘नगरफूल’ घोषणा गरेको छ। तिलोत्तमा अहिले विश्वका ४० सफा नगरमध्ये एकमा परेको छ।
