जिल्ला कारागार प्रशासनले कोभिडको बेला निर्माण भएको एउटा सानो तथा छुट्टै कोठामा लामिछानेलाई राखेको छ । कोभिडको बेलामा त्यो कोठा निर्माण भए पनि प्रयोगमा आएको थिएन ।

अन्य कैदीसँग राख्दा लामिछाने असुरक्षित हुने भएकाले खाली कोठालाई प्रयोग गरिएको कारागार प्रशासनको भनाइ छ ।

पूर्वगृहमन्त्री समेत रहेका लामिछानेलाई कारागारमा भेटघाट गर्न खासै कोही आउँदैनन् । सामान्यतः दैनिक दुई/चार जनाबाहेक उनलाई भेट्न कोही आउने नगरेको कारागार प्रशासन स्रोतले जनाएको छ ।

स्रोतका अनुसार कारागारभित्र लामिछानेले अध्ययनमा धेरै समय बिताउने गरेका छन् । ऐतिहासिक पुस्तकहरूमा उनको रुचि रहेको बताइएको छ । नेपाली र अङ्ग्रेजी भाषाका पुस्तक उनको रोजाइमा परेका छन् ।

लामिछानेले कारागारभित्रै पकाइएको खाना खाने गरेका छन् । त्यसमा सामान्यतया दाल, भात, तरकारी नै रहने स्रोतको भनाइ छ ।

कारागार प्रशासनले भित्र रेडियो सुन्न र फोन गर्ने व्यवस्था बन्दीहरूलाई मिलाएको छ । कहिलेकाहीँ रवि लामिछानेले पनि फोनको प्रयोग गर्ने कारागार स्रोतको भनाइ छ ।

कारागार प्रशासनले रवि लामिछानेलाई ‘तपाईंको केही माग छ ?’ भनेर समेत सोध्ने गरेको छ । जवाफमा उनले ‘केही छैन । जे छ, ठिकै छ । कारागार यस्तै हो’ भन्ने गरेको स्रोत बताउँछ ।

रवि लामिछानेका सहयोगीहरू उच्च अदालतको आदेशविरुद्ध सर्वोच्च अदालतमा पुगेका छन् । सर्वोच्च अदालतले कैफियत आदेश मगाएको छ । त्यो आदेश हेरेपछि मात्रै सर्वोच्चले उनको बारेमा निर्णय लिनेछ ।

न्यायाधीश रमेश ढकाल र स्वीकृति पराजुलीको संयुक्त इजलासले बुटवलस्थित सुप्रिम सहकारी ठगी सम्बन्धी कसुर र सङ्गठित अपराध सम्बन्धी मुद्दामा जिल्ला अदालतको आदेश उल्टाउँदै रविलाई थुनामा पठाउने आदेश गरेको हो ।

रातोपाटी बाट साभार