भैरहवा । रुपन्देहीको तिलोत्तमामा आज लेजेण्ड्स कप क्रिकेट हुँदैछ।
गुल्मीका गैरआवासीय नेपाली विनोद कुँवरले निजी लगानीमा निर्माण भएको एक्स्ट्राटेक ओभल क्रिकेट रंगशालाको उद्घाटनको अवसरमा ‘तिलोत्तमा एक्ट्राटेक लेजेण्ड्स कप क्रिकेट’ हुन लागेको हो।
टी-१० फरम्याटमा हुने खेल विहान ९ बजेदेखि हुने कुँवरले जानकारी दिए ।
प्रतियोगितामा नेपालको पहिलो अन्तर्राष्ट्रिय खेल खेलेको सन् १९९६ को टोली, सन् २०१४ को टी-२० विश्वकप खेलेको टोली, रूपन्देही लेजेन्ड्स र रेस्ट अफ नेपालबीच प्रतिस्पर्धा हुनेछ।
नेपाल क्रिकेट संघ (क्यान)का सचिव पारस खड्काले सन् २०१४ टोलीको कप्तानी गर्नेछन्।
सन् १९९६ को कप्तानी एलबी क्षेत्री, रेस्ट अफ नेपालको कप्तानी कलाम अली तथा रुपन्देही लेजेन्ड्सको कप्तानी हरिबहादुर थापाले गर्ने बताइएको छ।
रंगशाला खेल्नका लागि तयार भए पनि अझै केही भौतिक निर्माण भने बाँकी छ।
