बुटवल । पाल्पामा खानेपानीको समस्या हट्दै गएको छ । पाल्पाका अधिकांश स्थानमा एक गाग्री पानीका लागि दुई तीन घण्टा हिड्नु पर्ने बाध्यता हराउदै गएको छ ।
घरघरमा खानेपानीको धारा पुगेपछि अहिले सहज भएको छ । तीनै तहका सरकारले खानेपानीलाई प्राथमिकतामा राखेपछि पछिल्लो ६ बर्षमा पाल्पाका अधिकाशं बस्तीमा खानेपानीको सुविधा बढ्दै गएको हो ।
१० बर्ष अघिसम्म पाल्पाका एक तिहाई घरपरिवारमा खानेपानीको अभाव थियो ।
अहिले ५० प्रतिशत भन्दा बढी घरपरिवारको घरघरमा खानेपानीको सुविधा छ ।
खानेपानीको अभावकै कारण अधिकांश वस्ती खाली हुदै गएको समयमा घरघरमा खानेपानीको धारा पुगेपछि बसाई सराई गर्ने क्रममा कमी आएको छ । वस्तीहरुमा खानेपानीको धारा पुगेपछि पाल्पाका गाउं गाउंमा खुसीयाली छाएको छ ।
घरघरमा खानेपानीका धाराको सुविधाले पानी बोक्ने दुख् हराएको बताउंछिन् छहरा मलावासकी सिता बराल ।
घरघरमा धाराको सुविधा भएपछि वालवालिकाले पढ्न पाएका छन् । गाउं गाउंमा तरकारी खेती बढेको छ ।
डांडा, पाखाको दुर्गम बस्तीका विधालयहरुमा पानीको अभावमा बलेनी पानी खाने विधार्थीका लागि लिफ्ट खानेपानी योजनाले राहत दिएको छ ।
राष्ट्रिय जनगणना २०७८ अनुसार पाल्पामा ६५ हजार ४९ घरधुरी रहेकोमा, २०८० असार मसान्तसम्म करिव ३५ हजार घरपरिवारमा एक घर एक धारा पुगेको छ ।
पाल्पाका सबै स्थानीय सरकारले आगामी २०८४ भित्र सबै घरमा एक घर एक धारा पुराउने गरी खानेपानी योजना संचालन गरेका छन् ।
