कोरिया सपनाबाट रोकिएपछि बनेको नयाँ सपनाले न्यौपानेलाई पूर्ण सन्तुष्टि दिएको छ । उनलाई अहिले बुटवलमा कोरियन भाषा ‘किङ’ भनेर चिनिन्छ । कहालिलाग्दो विगत, कठिन र अँध्यारा बाटाहरू पन्छ्याएर आफ्नै संघर्ष र मेहनतले चम्किएका न्यौपानेलाई बुटवलमा नचिन्ने सायदै होलान् ।

गडी गाउँपालिका–४ (तत्कालीन आमभञ्ज्याङ–१ बुङदल) मकवानपुरमा जन्मिएका जगन्नाथको बुटवलमा ‘जेएन’ कोरियन भाषा कक्षा, रोजगार इन्स्टिच्यूट छ । बुटवलमा उनलाई ‘ग्रामर किङ जेएन सर’ भनेरै बोलाउने गर्छन् । उनलाई दिइने यी सबै उपनामको एउटै कारण हो, कोरियन भाषा कक्षामा राम्रो पढाइ र नतिजा ।

सन् २०१२ मा क्रिस्टल ल्याङ्वेज इन्स्टिच्युट सैनामैनामा कोरियन भाषा अध्ययन गरेर न्यौपानेले नाम निकालेका थिए । त्यसपछि उनले सन् २०१३ बाट होराइजन इन्स्टिच्युटमा कोरियन भाषा पढाउन थाले । पछि यसको नाम रोजगार इन्स्टिच्युट भयो । सोही सालबाट उनले पढाएका विद्यार्थीले कोरियन भाषा परीक्षामा चामत्कारिक नतिजा ल्याउन थाले । परिणामतः उनको परिचय ‘कोरियन भाषाका वैकल्पिक उपाय जेएन सर’ बन्यो । उनकोमा भाषा पढ्ने ९० प्रतिशतभन्दा बढी विद्यार्थी उत्तीर्ण हुन्छन् ।

आफ्नो खुशीको फैलिँदो आयतनबारे जेएन भन्छन्, ‘जब मैले भाषा सिकाउन थालें, त्यसपछि मलाई कहिल्यै पछि फर्किनुपरेको छैन । विद्यार्थी थामिनसक्नु भीड छ । मैले पढाएपछि विद्यार्थी पास हुन्छन्/हुन्छन् । त्यहीँ भएर जेएन सरको भाषा सिकाइ केन्द्र भन्दै नेपालका विभिन्न जिल्लाबाट दैनिक सयौं फोन आउँछन् ।’

एक दशकमा उनले हजारौं विद्यार्थी उत्तीर्ण गराएर कोरिया पुगिसकेका छन् । ६ दिदीबहिनी, ४ दाजुभाइ मध्येका साइला छोरा हुन् न्यौपाने । गरीब परिवारमा जन्मे, हुर्केका उनले प्रारम्भिक शिक्षा बुङदलमा रहेको सरस्वती आधारभूत विद्यालयबाट प्राप्त गरेका थिए । ६ देखि १० कक्षासम्म उनले आमभञ्जाङको शारदा माध्यमिक विद्यालयमा अध्ययन गरे । न्यौपानेले ‘प्लस टु’ मकवानपुर बहुमुखी क्याम्पसमा पढ्दै थिए, त्यसबीच उनको जीवनले नयाँ मोड लियो । २०६१ साउन २४–२६ गतेसम्म परेको अविरल वर्षासँगै आएको बाढीले जग्गा–जमिन बगरमा परिणत गराइदियो । बाढीपहिरोले घरबारविहीन उनको परिवार त्यहाँबाट विस्थापित भएपछि तत्कालीन आमभञ्जाङ–३ मा बस्न थाल्यो तर जेएन भने कामको खोजीमा बुटवल आए ।

बुटवलमा उनका दाजु पुरुषोत्तम बुटवल–काँकडभित्ता रूटमा गाडी चलाउँथे । उनी केही महिना दाजुसँगै बसे । पछि उनी आफ्नै तरिकाले बस्न थाले । यो २०६२ सालको कुरा हो । त्यसपछि उनले २०६२ सालमै पर्रोहा उच्च माविमा ‘प्लस टु’ पढेर उत्तीर्ण गरे । आर्थिक अभावले गर्दा उनी विक्रम संवत् २०६३ सालमा ‘ब्याचलर’मा भर्ना हुन सकेनन् । आर्थिक कठिनाइका कारण त्यो बेला उनका दिन चुनौतीपूर्ण रहे ।

यसबीचमा आफ्नो दैनिक हातमुख जोर्न उनले रिटेलिङ बिजनेश, होम ट्युसन, अंग्रेजी ट्युसन समेत पढाए । १ वर्षपछि विक्रम संवत् २०६४ सालमा उनी फेरि ब्याचलर पढ्न थाले ।

विक्रम संवत् २०६८ सालमा उनले बीएड उत्तीर्ण गरे । न्यौपाने यो सफलता आफ्ना गुरू ऋषि न्यौपानेप्रति समर्पित गर्छन् । ऋषिकै कारणले आफू आज यो स्थानमा आएको न्यौपाने बताउँछन् । बुटवल तामनगरमा उनले कसैसँग १०० रुपैयाँ माग्दा तिर्न सक्दैन भनेर नपत्याएपछि ऋषिले नै उनलाई संघर्ष गर्न सिकाएका थिए । कुनै बेला १०० रुपैयाँ समेत नपत्याइएका न्यौपानेले कोरियन भाषा पढाएरै बहिनी रजनितालाई स्टार्फ नर्स पढाए । करोडभन्दा बढी सम्पति कमाए । यो सफलतामा उनकी पत्नी आरती न्यौपाने पनि खुशी छिन् ।

न्यौपाने आफूले प्रयोगात्मक विधिबाट कक्षा सञ्चालन गरेकै कारण सफलता मिलेको बताउँछन् । उनले ५ महिना निरन्तर भाषा कक्षा पढाउँछन् । २ महिना त्यही विषयलाई पुनः पढाउँछन् । उनका सबै भाषा कक्षाहरू भरिभराउ छन् ।

सबै भाषा कक्षाका कोर्सहरू यूट्युबमार्फत पनि हेर्न र पढ्न सकिन्छ । यसबीच उनीबाट भाषा सिकेकाहरूले बुटवलमा दर्जनभन्दा बढी कोरियन भाषा कक्षाहरू सञ्चालन गरेका छन् । यो देख्दा जेएनलाई धेरै खुशी लाग्छ । पढाइ अवधिमा करीब १०० आन्तरिक परीक्षाहरू गराउने उनले बताए । ‘१०० भन्दा बढी परीक्षा गराउँदा विद्यार्थीमा थप भाषाको ज्ञान बढी हुन्छ, त्यसकारणले पनि मेरो नजिता राम्रो आएको हो,’ उनी भन्छन् ।

बुटवलमा १०० भन्दा बढी प्रशिक्षक उत्पादन भइसकेका उनले बताए । विपन्न र पालिकाबाट सिफारिस आएकालाई निःशुल्क पढाउने व्यवस्था इन्स्टिच्यूटले मिलाएको छ । उनीसँगै ९ जना प्रशिक्षकले भाषा पढाउँछन् । आरतीले अहिले इन्स्टिच्यूटमा प्राचार्यको भूमिकामा छिन् ।

अनलाइन कक्षा शालिक अधिकारीले हेर्छन् । अनलाइन पढ्न चाहनेका लागि सबै कक्षाका कोर्सहरू निःशुल्क उपलब्ध गराइएको छ । केही इन्स्टिच्यूटले ‘ग्यारेन्टी कोरियन भाषा पास’ भन्ने भ्रम फैलाएर कक्षा सञ्चालन गरेको भन्दै त्यसबाट जोगिन भाषा पढ्न रुचि भएकाहरू सचेत रहन जेएनको आग्रह छ । विगतका पीडाका ठूला पहाडहरूलाई छिचोलेर यहाँसम्म आइपुगेका जेएन आफ्नो सफलताको श्रेय आफूसँगको टीमलाई दिन्छन् ।

‘राम्रो रिजल्ट दिन मेरो टीम लागेको छ । सीप र ज्ञानले नै अहिले त मलाई चाहिने खुशी र सन्तुष्टिको सर्वस्व नै छ,’ उनले भने ।

लोकान्तर डटकमका लागि यो स्टोरी बुटवल बाट प्रकाश आचार्यले लेखेका हुन ।