लुम्बिनी प्रदेश सरकारको आर्थिक वर्ष २०८०–८१ को बजेट माथिको छलफल आज हुँदैछ । आज १ बजे बस्ने प्रदेशसभा बैठकमा बजेटमाथि छलफल हुने कार्यसूची रहेको प्रदेशसभा सचिवालयले जनाएको छ ।
बजेटमाथि धेरैको असन्तुष्टि बढेपछि असार १० गतेको बैठक स्थगित गरिएको थियो । त्यसपछि १३ गतेको लागि बैठक बोलाइए पनि प्रमुख प्रतिपक्षी नेकपा एमालेले संशोधनको माग राख्दै बैठक अवरुद्ध पारेको थियो
।
लुम्बिनी प्रदेश सरकारले आगामी आर्थिक वर्षका लागि असार १ गते ४० अर्ब ४७ करोड ८९ लाख बराबरको बजेट ल्याएको थियो । समृद्ध लुम्बिनी, आत्मनिर्भर प्रदेश बनाउने मुख्य लक्ष्यसहित बजेट आएको छ । सरकारले बजेट प्रदेशसभामा प्रस्तुत गरेको करिब दुई साता बितिसक्दा समेत छलफल हुन सकेको छैन ।
प्रदेश सरकारले प्रस्तुत गरेको बजेट पूर्वाग्रही र बेथिति निम्त्याउने खालको रहेको र जनमानसमा सिङ्गो सङ्घीयताप्रति नै नकारात्मक धारणा उठिरहेका बेलामा झन् नकारात्मकता थप्ने गरी आएको बजेट नागरिकको चाहनाविपरीत रहेको एमाले संसदीय दलका नेता तथा पूर्वमुख्यमन्त्री लिला गिरी बताउँछन् ।
लुम्बिनी प्रदेशमा प्रदेश सरकारले मन्त्रालय मातहतमा रहेका निर्देशनालयहरू खारेज गर्ने निर्णयले खर्च कम हुने प्रदेश सरकारले दाबी गरे पनि एमालेले विरोध गर्दै आएको छ ।
