नेपाल सरकार र एसियाली विकास बैंकको संयुक्त लगानीमा संचालन हुने परियोजनाको लागि दातृ निकायबाट प्राप्त हुने १३ करोड ४० लाख, मालपोत कार्यालयबाट प्राप्त हुने राजस्व बाँडफाँडको रकम ५ करोड रुपैया, आन्तरिक आयबाट १९ करोड ९५ लाख र अनुमानित बैंक मौज्दात ११ करोड ८९ लाख ३२ हजार ५ सय ८७ रुपैयाँ गरि १ अर्ब १३ करोड ४१ लाख ४२ हजार हुने अनुमान गरिएको छ । यस्तै सिद्धार्थनगर नगर पालिकाको १३ औ अधिवेशनमा नगरपालिकाका प्रमुख इस्तियाक अहमद खानले नीति तथा कार्यक्रम प्रस्तुत गर्दै टुक्रे एवम् साना योजनाहरुलाइ निरुत्साहित गर्ने नीति अपनाइएको जनाए ।

‘कृषि, पर्यटन, उद्योग, व्यापार र शिक्षास हराभरा बुद्धभूमि सिद्धार्थनगरको इच्छा’ भन्ने नारासहित नगरपालिकाको दीर्घकालिन सोचलाई साकार पार्ने गरि पालिकाले नीति लिएको जनाएको छ । नगरपालिकामा सुशासन कायम गर्दै सर्वाङ्गिण क्षेत्रको संस्थागत विकासमा जोड दिईने, कृषिको आधुनिकीकरण, सहकारी क्षेत्रको सुशासन, पर्यटन र उद्योग–व्यापार क्षेत्रको विस्तार र विविधीकरणमा जोड दिईने नीति तथा कार्यक्रममा उल्लेख छ । शिक्षा र स्वास्थ्यमा नागरिकको पहुँच र गुणस्तर अभिवृद्धि गर्दै समावेशी विकासमा जोड एवम दिगो विकास, वातावरण मैत्री कार्यक्रम तथा वातावरण संरक्षणमा जोड दिइने नगर प्रमुख खानले बताए ।

नगरका गौरवका योजनाहरु, बहुवर्षीय, क्रमागत योजनाहरु र अन्य आधारभूत पूर्वाधार निमार्ण मार्फत सन्तुलित र गुणस्तरीय विकासमा जोड दिइने उनको भनाइ छ । सार्वजनिक भएको १ सय ३३ बुंदे नीति तथा कार्यक्रममा नगरपालिका क्षेत्रभित्र पर्यटकलाई आकर्षित गर्न आधुनिक घण्टाघर निर्माण गरिने उल्लेख छ । नगरक्षेत्र भित्र सार्वजनिक सडकमा पार्किङ्गको ठेक्का नलगाउने पालिकाको नीति छ । निजी क्षेत्र समेतको सहभागीतामा पार्किङ्गको लागि नविनतम विकल्पहरुको खोजी गरिने तथा सेवाग्राहीको चाप बढि हुने संघ संस्थाले आफै पर्किङ्गको ब्यवस्था गर्नुपर्नेछ ।